MANG Juhai dan Mang Oding tak abis pikir memasuki tahun 2014 yang katonyo shio Kuda menurut tahun Cino. Ngapo pacak mak itu Mang, baco bae ceritonyo sampe selesai yo.
Pecak biaso tulah, saban pagi, Mang Juhai dan Mang Oding, masih gaya toke tulah. Walaupun tahun sudah 2014, keduo sohib kental itu, masih ngabiske waktu dengan ngobrol, bukannyo nak nyari gawean. Pagi kemaren, keduonyo masih nongkrong di teras rumah Mang Juhai, sambil ngopi, makan nasi goreng, dan baco Koran pecak politikus atau pejabat pemerintah.
‘’Oh yo kando, pecaknyo tahun 2014 ini kito diawali dengan bencana lagi. Malah bencananyo pecak besak-besak nian ye,” ujar Mang Oding memulai omongan. ‘’Benar kato kau itu Ding, banyak nian bencana diawal tahun ini. Mulai dari di banyu, di darat, sampe di udara sekalipun. Ado pertando apo ini ye,” ucap Mang Juhai sambil senyum-senyum.
‘’Neh pecak nak bahayo nian Negara kito ini, apolagi ini menjelang pemilu kando,” tutur Mang Oding. ‘’Nak bahayo nian, banyak warga sengsaro di provinsi lain, untung bae kito masih nyantai. Walaupun banyu sempat tinggi, tapi masih genangi jalan bae, sementaro rumah kito belum dimasuki banyu Ding,” kato Mang Juhai sambil ngisap rokok di tangannyo.
‘’Bukan Cuma banjir kando, korban jiwa jugo banyak, kalo kito baco di Koran dan nonton Tv,” ungkap Mang Oding lagi. ‘’Benar Ding, kasus Kapal tenggelam, berapo korban, berapo kali kejadian. Kemudian, banjir bandang di Sulawesi itu, berapo kerugian, berapo korban. Belum lagi ado yang tenggelam di banjir di Pulau Jawo, Jakarta, Jabar, Banten dan sekitarnyo. Kemudian, belasan uwong mati keno awan panas Gunung Sinabung di Sumut. Masih banyak lagi kejadian besak, bahkan memakan korban,” jelas Mang Juhai.
‘’Lucunyo, disaat warga saro mak itu, masih banyak uwong yang manfaatke kesempatan, terutamo caleg kando,” tutur Mang Oding. ‘’Kalo caleg itu, idak ngerti kito Ding, apo nak bantu nian, apo nak nyari imbalan. Soalnyo, kalo mereka bantu nian, pasti akan dapat pahalo. Tapi kalo Cuma nak nyari suaro pas pemilu, mintaklah suaronyo idak tedongkrak, pahalonyo jugo idak katek, sebab idak ikhlas bantunyo,” tukas Mang Juhai.
‘’Boleh jugo omongan kamu itu kando, tapi caleg dan capres konvensi jagoan kito idak mak itu kan kando,” tanyo Mang Oding. ‘’Kalo caleg jagoan kito, yakin bae, memang murni nak bantu dan ikhlas. Soalnyo, selain duitnyo la banyak, dio jugo memang murni nak jadi politisi. Kemudian capres konvensi kito, memang dari sebelum tekenal, kalo nak bantu atau bebuat itu, idak pernah peritungan Ding,” tambah Mang Juhai. Hahaha, ujung-ujungnyo masih nak balek ke caleg jagoan kamu tulah kando ye. (sam)