MANG Juhai dan Mang Oding laju ngadiri acara pameran foto yang diadoke di kotanyo. Soalnyo, salah sikok peserta pameran itu, ternyata kawan lamo mereka. Tapi apo mereka memang niat ngadiri acara atau ado tujuan lain, baco cerito lengkapnyo.
Siang kemaren, Mang Juhai dan Mang Oding, berencano ke salah sikok Mall di kotanyo. ‘’Kando, daripado katek gawe, kito ke Mall itu bae, kan ado undangan dari kawan lamo kito, Mang Koer,” kato Mang Oding. ‘’Oh yo Ding, Mang Koer yang fotografer salah sikok media kebanggaan uwong kito itu yo,” jawab Mang Juhai sambil senyum-senyum.
‘’Sudah kalo mak itu, kando pamitlah dengan Ayuk Jubai, aku pamit dengan uwong rumah,” tutur Mang Oding. Setelah pamitan, keduo sohib kental ini langsung menuju Mall, yang katonyo ado acara pameran foto itu. ‘’Wah bagus-bagus fotonyo kando, bolehlah para fotografer disini ye, mantap-mantap nian caro ngambek angel gambarnyo,” puji Mang Juhai.
‘’Iyo kando, mantap galo fotonyo. Ini kato panitia yang ditampilke ini, foto yang sudah diseleksi. Kemudian, foto itu semuanyo foto kejadian saat 2013 lalu,” tutur Mang Oding lagi. ‘’Benar Ding, ado galo foto kejadian tahun 2013. Pacak ngingatke kito tentang kejadian-kejadian itu. Otak kito diajak ngingat-ngingat laju,” ungkap Mang Juhai.
‘’Bukan, tapi aku baru sadar dengan omongan kamu yang mantap fotonyo itu kando. Memang fotonyo nian, apo background di belakangnyo kando,” tanyo Mang Oding sambil senyum dikulum. ‘’Yo fotonyo nian Ding, memang ngapo,” Mang Juhai balek betanyo. ‘’Bukannyo kamu ngomong mantap foto itu, kareno di belakang foto ado counter Hp yang dijago betino cantik itu ye,” cecar Mang Oding.
Ternyato memang di belakang foto itu, ado penjago counter cantik pake rok mini. ‘’Ai nak tau bae kau ini Ding. Biasolah Ding, cuci mato sekalian. Memang tujuan utamo nak jingok pameran foto, kareno diundang kawan lamo. Tujuan sampingannyo cuci mato,” terang Mang Juhai.
‘’Benar itu kando, sepakat aku. Soalnyo, kalo tujuan lain kito nak belanjo idak masuk. Soalnyo, duet lagi idak katek di kantong, makmano nak belanjo,” tambah Mang Oding. Hahaha, bolehlah tujuan kamu beduo ni mang. Jadi selain jingok pameran foto, jugo nak cuci mato. Hmm, Mang Juhai beteriak la tobat, tapi masih bae mato ngelirik. (sam)