MANG Juhai dan Mang Oding, idak abes pikir dengan kegiatan oknum caleg yang galak masangke spanduk atau baliho di jalan protokol atau di fasilitas umum, misalnyo tiang listrik, median jalan, pohon dan sebagainyo. Apo sebenarnyo yang dicari oknum caleg itu, berikut ceritonyo.
Siang kemaren, Mang Juhai dan Mang Oding langsung geleng-geleng kepala, dengan banyaknyo spanduk atau baliho caleg yang disita Pol PP, kareno dianggap melanggar aturan kampanye. ‘’Woi makmanolah caleg-caleg itu kando, madaki pasang spanduk atau baliho di Jalan Protokol dan fasilitas umum mak itu. Kan la tau dilarang, tapi masih banyak bae yang masang disano,” ujar Mang Oding.
‘’Idak ngerti lagi aku Ding. Kalo sekilas kito jingok, pecak tekak bantah nian oknum caleg itu. Sebab, setelah disita Pol PP kan, memang katonyo boleh diambek lagi. Tapi, kapan la disita itu, kebanyakan rusak galo barang itu,” tutur Mang Juhai. ‘’Yo kando, idak tau aturan, atau memang sengajo itu kando ye,” tanyo Mang Oding.
‘’Aku kiro kapan la jadi caleg tu, mereka pasti paham aturan. Namun, ado mungkin yang nak pengen ngetop dewek, jadi pasangan di fasilitas umum. Keduo, biso jugo sebenarnyo yang idak paham aturan itu bukan oknum calegnyo, tapi timses yang masang barang itu. Kemudian, biso jugo timses ini penting dapat duit, pasang basing-baseng bae spanduk atau baliho itu,” terang Mang Juhai.
‘’Benar jugo penjelasan kamu itu kando. Tapi yang jelas, aku kiro caleg itu cuma buang-buang duit bae. Buat spanduk atau baliho la berapo. Baru dipasang beberapo minggu, la dicabut Pol PP. Berapo ratus juta duit tebuang bae, paling yang untung uwong percetakan. Cubo kalo duit itu dialihkennyo untuk bangun jalan di kampung-kampung atau bantu sembako fakir miskin, mungkin suaro dapat, pahalo jugo dapat asal kito ikhlas,” ungkap Mang Oding.
‘’Benar jugo omongan kau itu Ding. Kalo ratusan juta dibantu ke fakir miskin atau warga dapilnyo, berapo banyak uwong kebagian beras dan mie misalnyo. Aku kiro akan lebih nyentuh. Namun, katonyo kalo kasih duit langsung idak boleh jugo, kareno dianggap money politik. Tapi aku kiro, oknum caleg itu la siap nian Ding. Duit untuk spanduk atau baliho ado jatahnyo, lalu untuk sembako la disiapke, termasuk duit serangan fajar biso jadi la ado,” tambah Mang Juhai.
Hahaha, mungkin kapan sanggup jadi caleg, oknum itu la siap nian duitnyo. Makonyo, uwong mak itu, biso jadi, kapan lah jadi, tinggal nyari untuk mbalekke duitnyo dulu, baru bantu rakyat atau pemilihnyo. (sam)