MANG Juhai dan Bik Jubai, cuma pacak geleng kepalak, pas balek ke dusun mertuo Mang Juhai (rumah uwong tuo Bik Jubai), beberapo hari lalu. Soalnyo, mertuo Mang Juhai itu kan banyak anak, dan sekarang sudah bekeluargo galo. Apo yang terjadi selamo mereka kumpul di dusun tersebut, berikut ceritonyo.
Kareno nak ado hajatan, Mertuo Mang Juhai, ngumpulke anak dan menantunyo di dusunnyo sano. ‘’Juhai, Jubai, pokoknyo kamu sebagai anak penengah, harus biso ngumpulke adek atau kakak kamu ye. Soalnyo, selain kami pengen anak menantu ngumpul, jugo kito nak ngadoke hajatan dikit di rumah ni,” ujar mertuo betino Mang Juhai melalui telepon.
‘’Yo Mak, kagek kami telepon galo anak menantu Mak itu, biar kumpul galo di dusun,” jawab Mang Juhai. ‘’Pokoknyo aku taunyo jangan ado yang dak datang, termasuk cucu-cucu jugo harus datang,” tambah mertuo betino Mang Juhai itu. ‘’Yakin bae Mak, pasti kami anak menantu ni, nyiapke waktu untuk kumpul Mak ye,” tutur Mang Juhai.
Benar nian, duo hari sebelum acara, anak menantu maupun cucu-cucu sudah kumpul di rumah mertuo Mang Juhai itu. Kareno banyak sifat dan pribadi, akhirnya Mang Juhai dan Bik Jubai, sebagai penengah, Cuma pacak geleng-geleng kepalak bae oleh ulah beberapo menantu betino mertuo Mang Juhai itu. ‘’Makmano itu dek, alangkah macam-macamnyo menantu betino Mak,” ujar Mang Juhai samo Bik Jubai.
‘’Yo kak, aku jugo perhatike, pecaknyo berebut perhatian galo dari Mak. Nak mintak diomongke menantu berbakti, dan saling iri pecaknyo,” jawab Bik Jubai. ‘’Yo nian Dek, apolagi menantu betino tertuo Mak, pecaknyo segalonyo dio galo yang benar. Mulutnyo galak dak dijago, terus idak mikir, apo adek ipar atau bini adek ipar tu tesinggung. Padahal, omongan atau ucapan dio itu, belum tentu benar galo,” simbat Mang Juhai.
‘’Ai biasolah kak, caro meraso jadi yang paling tuo, mano lakinyo jugo idak pulok pacak njago ucapan bininyo. Jadi intinyo, kito sebagai yang mudo, maklum bae, ngalah bae, daripado jadi masalah. Cukup adek ipar kito itu bae, dulu dimusuhinyo, sampe dak diajak teguran. Makonyo, sekarang, lemak kito agak ngindar bae, daripado ecak-ecak akrab, salah ucap dikit, laju jadi musuh. Dak lemak pulok, bemusuhan sesamo adek beradek ni kalo kito yang waras,” terang Bik Jubai.
‘’Makonyo kakak agak jago jarak dengan ayuk kito sikok itu dek, takut kesalahan ngomong, bukannyo nambah akrab, malah dimusuhinyo. Kemudian, aku galak dak sepaham tu, kareno apo yang diucapkennyo itu, galak idak sesuai dengan perbuatannyo,” ungkap Mang Juhai. ‘’Nah kalo paham kak, aku bae sering jadi katoan dio, padahal dio lebih parah dari aku malasnyo,” tambah Bik Jubai. Hahaha, susah jugo mang, bik ye, kalo banyak dulur tu, pasti ado bae, dari dulur itu, yang idak sepaham dengan dulur lainnyo. (sam)