PAS kumpul seluruh anak menantu serta cucung dari mertuonyo, Mang Juhai tibo-tibo nyeletuk kalo diantaro yang kumpul itu, ado yang kurang. Mang Juhai berani ngomong kurang lengkap, kareno ado anak kakaknyo yang idak kumpul di acara itu. Siapo itu, baco ceritonyo sampe selesai.
Di rumah mertuonyo, Mang Juhai dan Bik Jubai, kumpul samo seluruh anak menantu dan cucung sang mertuo. ‘’Nah bahagia nian aku kalo jingok anak, menantu, cucung kumpul galo mak ini. Ado gunonyo jugo retinyo aku banyak anak dulu, walau masih kecik-kecik saro ngurusnyo. Buktinyo kapan la tuo mak ini, teraso rame rumah ini, apolagi banyak cucung-cucung kumpul,” ujar mertuo betino Mang Juhai.
‘’Yo Mak, segalonyo anak dan menantu mak, termasuk cucung ado galo disini. Mudah-mudahan ado banyak cerito dengan kumpul mak ini, walaupun jarang,” jawab Bik Jubai yang duduk disebelah Mang Juhai. ‘’Benar itu Mak, tapi rasonyo ado yang kurang lengkap dari segalonyo ini Mak ye,” terang Mang Juhai sambil narik nafas panjang.
‘’Maksud kau itu apo Juhai, perasaan Mak, segalonyo la ado, bahkan la lengkap,” tanyo mertuo betinonyo itu. ‘’Mak ingat-ingat dulu, ado yang kurang lengkap,” ujar Mang Juhai lagi sambil senyum-senyum. ‘’Cubo kau sebutke nian Juhai, jangan buat Mak bingung. Segalo anak dan seluruh menantu, la kumpul galo disini, kau masih ngomong cak itu,” tutur mertuonyo penasaran.
‘’Mak nak tau, kan cucung Mak yang kumpul ini Cuma berapo ikok. Seingat aku, ado duo ikok lagi cucung Mak, betino dan Lanang, idak kumpul disini. Anak kakak dengan bininyo yang pertamo Mak. Bahkan, jangankan anak-anak kami, aku dan menantu Mak yang lain bae, katek yang kenal dengan duo cucung Mak itu,” terang Mang Juhai.
‘’Iyo Juhai ye, duo cucung kami itu idak kumpul. Pecak la lupo itu kami Juhai, kareno la betahun-tahun idak ketemu. Sebenarnyo, kami la sempat nak nemui dan nak ngambeknyo pas kakak kau dengan bininyo cerai dulu. Tapi bininyo dak galak ngasih dan janji nak ngasuh duo cucung kami itu. Bahkan, kami bae dijauhke oleh besan atau uwong tuo bini kakak kau dulu itu,” ungkap mertuo Mang Juhai.
‘’Sudah lah Mak, kagek nyari dewek duo cucung Mak itu dengan kito. Apolagi cucung Mak yang betino itu, kapan la nak nikah kagek, pasti nyari bapaknyo atau dulur lanang bapaknyo, untuk wali nikahnyo. Jadi tenang bae, kagek pasti duo cucung Mak itu tau, kalo bapaknyo masih idup, termasuk dulur bapaknyo banyak,” tambah Bik Jubai. Hahaha, ambek bae suruh mertuo kamu tu Mang, jika perlu ajak oleh kamu ngasuhnyo, biar ado rewang dari Mac Dul. (sam)