MANG Juhai lagi dak kelemakan dewek dengan kawannyo Triono yang wartawan itu. Soalnyo, pas beli emas di toko emas di Cinde, dio ketemu Triono yang sedang liputan disano. Nanyo apo Triono dengan Mang Juhai, baco bae ceritonyo dibawah ini.
Siang kemaren, Mang Juhai becepat ke toko emas di Cinde. Sebab, dio diminta tolong oleh misannyo dari dusun sano, untuk beli cincin emas. Maklum, adek misannyo itu nak kawen. Tapi tulah, lagi lemak nego hargo emas dengan pemilik toko emas, tibo-tibo bahu Mang Juhai ditepuk uwong dari belakang.
‘’Oy kando, ado apo kando. Pecaknyo nak beli cincin emas ini, nak ngapo nian, curiga ayuk,” tanyo Triono sambil senyum-senyum. ‘’Neh kau ini ruponyo lur, aku kiro uwong nak ngehipnotis tadi tu, pake nepuk bahu. Idak lur, Cuma nak beli cincin emas bae, makonyo lagi nego rego dengan koko kito ini,” jawab Mang Juhai enteng.
‘’Jadi memang nak beli cincin emas nian kando. Untuk siapo, untuk ayuk mudo kami apo,” kelakar Triono. ‘’Huss, kau ini, jangan ngomong baseng-baseng. Ini cincin emas bukan untuk aku, tapi untuk adek misan aku di dusun sano. Dio memang nak kawen, makonyo pesan minta belike cincin ini. Kareno duet la dikirimnyo, becepat aku belike cincin, takut kagek salah guno dan abes, berabe kito makmano nak balekkennyo,” simbat Mang Juhai.
‘’Syukurlah kalo mak itu, dak jadi aku nak ngelapor dengan ayuk di rumah,” tutur Triono lagi. ‘’Memangnyo ngapo kau nak ngelapor dengan ayuk kau di rumah, memang gawe kando kau ini salah apo,” ucap Mang Juhai penasaran. ‘’La biso bae, kando ke pasar untuk beli cincin emas, ecak-ecak punyo dulur atau punyo kawan, idak taunyo kando nak kawen lagi,” jelas Triono sambil ketawo.
‘’Idak mungkinlah lur, kito ini tipe lanang setio, walaupun galak maen belakang, tapi itu sekadar hiburan bae, untuk untuk serius nian. Yakin bae, kando kau ini idak akan kawen lagi, ayuk kau di rumah tulah yang kando kau cintoi,” ungkap Mang Juhai. ‘’Alhamdulillah kalo mak itu, beruntung nian ayuk di rumah punyo laki mak ini,” tambah Triono. Hahaha, nyadar pulok mang dengan kehidupan. Gawe katek, idup numpang dengan bini, masih nak kawen lagi, nak enjuk makan apo anak uwong. (sam)