GARA-gara Mang Juhai galak ngisi bensin disalah sikok SPBU di Jalan A Yani, laju Bik Jubai ngambek. Ngapo laju marah itu Bik, baco bae ceritonyo sampe selesai.
Sore kemaren, Mang Juhai dan Bik Jubai, termasuk anak semato wayangnyo Mac Dul, jalan-jalan ke salah sikok Mall di Seberang Ilir. Pas nak balek, ruponyo minyak motor Mang Juhai sudah ngeres atau tinggal dikit. Namun, waktu nak diajak Bik Jubai ngisi minyak di SPBU Seberang Ilir, Mang Juhai ngomong dak usah, kareno nak ngisi di SPBU langganannyo bae.
‘’Nah la dikit lagi minyak motor kito ni dek, mudah-mudahan bae cukup sampe ke Seberang Ulu,” ujar Mang Juhai. ‘’Kalo memang cukup oke. Tapi kalo takut abes minyak tengah jalan, lemak kito ngisi dulu disini kak, sebelum balek ke rumah. Sebab pecaknyo memang la dikit nian minyak motor kakak tuh, kagek dak sampe kito,” jawab Bik Jubai.
Beruntung, memang minyak motor Mang Juhai sampe ke SPBU langganannyo di Jalan A Yani. ‘’Nah sampe jugo retinyo. Adek samo Dul, turunlah dulu, tunggu di kursi ujung itu bae, kakak ngisi minyak dulu yo,” kato Mang Juhai. Bik Jubai nurut bae, dan langsung ngajak Mac Dul nunggu di kursi ujung SPBU itu, soalnyo banyak antre motor jugo disano.
Tapi, Bik Jubai jadi heran, sebab la tinggal berapo ikok motor antre lagi, Mang Juhai dijingoknyo ngobrol samo betino penjago SPBU itu. Bahkan, dari jauh, Bik Jubai jingok mereka ngobrolnyo cak akrab nian, campur dengan senyum-senyum dikit. Kareno bawakan cemburu, Bik Jubai langsung ndekat dari belakang, hingga Mang Juhai idak sadar ado Bik Jubai.
‘’Oi ini retinyo gawe laki aku ye. Aku memang la curiga nian, selamo ini selalu nak ngisi bensin di SPBU ini nian. Bahkan, tadi bae diejoke sampe SPBU ini, untuk ngisi bensin yang la nak abes. Ruponyo ado langganannyo ngobrol yo disini. Dasar lanang kanji, awak la tuo, rambut la beruban, masih bae nak ngolahke betino,” ucap Bik Jubai dari belakang.
‘’Nah kak, ado ayuk itu. Jangan salah paham yuk, kami dengan kakak ni lalamo memang kenal yuk, dari aku belaki dulu, sampe sekarang aku jando. Bahkan, kakak ni kawan akrab laki aku dulu yuk,” terang betino penjago SPBU itu. ‘’Tu kan, la aku tebak nian, pasti kamu ni ado apo-aponyo ye, sekarang sudah ngisi bensin, balek kito,” Bik Jubai tambah emosi.
‘’Jangan salah paham dek, budak ini lah kakak anggap adek kakak dewek. Lakinyo dulu bukan cerai dengan dio ni, tapi mati. Ayu (betino penjago SPBU,red) ini, merupoke betino yang kuat dan tabah dek. Soalnyo, sejak ditinggal mati lakinyo, sampe sekarang idak galak belaki lagi. Bahkan, dio sanggup begawe di SPBU ini untuk ngidupi tigo anaknyo,” jelas Mang Juhai.
‘’Yo yuk, ayuk jangan marah dan cemburu itu dengan aku. Kami ni la adek beradek nian, tanyolah dengan Kak Oding. Selamo ini aku galak nak maen ke rumah ayuk, tapi selalu dak diajak kakak. Soalnyo, dio ngomong takut kagek banyak uwong salah paham, kareno status aku yang jando ini,” tutur sang penjago SPBU lagi.
‘’Ooh maafkelah kalo ayuk salah dek, sebab ayuk agak marah, kareno jingok kamu pecak akrab nian itu,” ungkap Bik Jubai malu-malu. “Dak apo-apo yuk, mak inilah kalo resiko jando, banyak omongan dak sedap, walaupun kito sebenarnyo uwong baek-baek,” terang penjago SPBU itu. “Yo sudah, kagek kakak ajak kau ke rumah kalo mak itu, biar idak salah paham lagi dengan ayuk kau ni ye Yu,” tambah Mang Juhai. Hahaha, jangan cepat emosi Bik Jubai, supayo idak salah paham. Tenang bae, laki kau tu, Cuma untuk koleksi kau bae, katek betino laen yang galak dengan dio tu. (sam)