MANG Juhai dan Mang Oding, laju geleng kepalak, gara-gara kasus tewasnyo polisi yang tugas disalah sikok Polres di Sumsel ini. Soalnyo, meskipun sang plisi itu sudah dikuburke, namun penyebab meninggalnyo masih simpang siur. Ado apo itu mang ye, baco ceritonyo versi mereka dibawah ini.
Pagi kemaren, Mang Juhai dan Mang Oding, baco berita di beberapo koran yang dibelinyo, yang ngatoke kalo tewasnyo plisi salah sikok Polres di Sumsel itu, masih misteri. Sebab, ado pernyataan resmi Kapolresnyo, ngatoke kalo anggotanyo itu tewas ditembak perampok, yang berhasil kabur, waktu nak mereka tangkap.
Tapi ado jugo versi warga ngomongke, kalo penangkapan itu tempat rame atau disaksike banyak warga, dimano plisi itu bukan keno tembak perampok yang kabur, tapi diduga keno tembak kawannyo dewek. ‘’Nah bahayo ini kando, ngapo ado duo versi penyebab kematian plisi itu ye. Awalnyo Kapolres ngomong mati kareno ditembak perampok, tapi isu lain bekembang, kalo plisi itu ditembak kawannyo dewek,” ujar Mang Oding.
‘’Yo nian Ding, makmano pacak mak itu ye. Tapi yakinlah Ding, kawan-kawan kito wartawan itu, bagus galo investigasi atau pendalaman beritanyo. Kalo aku agak yakin keno tembak kawannyo dewek tulah pecaknyo. Cuma kito dak biso ndului omongan penyidik, yang merupoke plisi jugo Ding. Kareno katonyo segalo kemungkinan biso terjadi,” jawab Mang Juhai.
‘’Kalo memang mati keno tembak kawannyo dewek, alangkah teganyo Kapolres dan pejabat Polres itu kando ye, bebohong untuk nutupi berita yang akan disebar media ke warga Sumsel. Semakin banyak uwong baco berita itu, semakin besak duso sang Kapolres yang bebohong itu. Dak biso dipercayo lagi berarti omongan Kapolres itu kedepannyo kando,” kato Mang Oding.
‘’Yolah Ding, pacak bejuta warga yang baco berita itu dikoran, samo nonton berita itu di Tv. Semakin banyak uwong tahu sebaran Kapolres yang salah, kalo memang benar ditembak kawannyo dewek, tanggung dewek duso sang Kapolres itu samo Tuhan. Walaupun tujuan dio nak ngelindungi anak buahnyo,” tutur Mang Juhai.
‘’Tapi ini kan baru versi masing-masing, segalonyo belum jelas. Kalo memang mati ditembak perampok nian, semoga perampok itu cepat tetangkap, jika perlu ditembak mati pulok kando. Sebab, la berani nian melawan penegak hukum,” uji Mang Oding. ‘’Sepakat aku Ding. Perampok itu la banyak nian salah, kalo memang dio yang nembak mati plisi itu. Mano bebuat kejahatan, kemudian nembak mati penegak hukum, samo punyo senpi, melanggar aturan galo itu Ding,” tegas Mang Juhai.
‘’Sekarang kito tunggu bae berita selanjutnyo yang dibuat wartawan, apolagi kemaren katonyo digelar rekontruksi tewasnyo plisi itu. Semoga bae terungkap fakta sebenarnyo, biar warga idak tejebak dengan berita yang salah kando. Kito jugo pacak jelas, plisi itu mati ditembak siapo nian kando, apo ditembak kawannyo dewek, apo ditembak perampok,” tegas Mang Oding.
‘’Mugo nian Ding diketahui fakta sebenarnyo dan idak ditutupi lagi oleh plisi, supayo idak njebak wartawan ngasih berita salah samo warga Sumsel khususnyo,” tambah Mang Juhai. Hahaha, kalo kemendan ngelindungi anak buah itu biaso mang, mungkin pernyataannyo benar adonyo atau versi warga nian yang salah mang. (sam)