AWALNYO Bik Jubai, ngotot minta hadiah valentine dengan Mang Juhai. Namun, setelah dengar jawaban Mang Juhai, Bik Jubai mulai ngerti dengan keadaan lakinyo. Jawaban apo yang diomongke Mang Juhai itu, baco bae ceritonyo dibawah ini.
Kareno bertepatan dengan tanggal 14 Februari, Bik Jubai langsung ngingatke Mang Juhai, kalo hari itu hari valentine atau hari kasih saying. ‘’Kak, kakak tuh masih sayang idak dengan adek ni. Kakak tau idak ini hari apo,” tanyo Bik Jubai. ‘’Yo masih sayanglah dek, adek mulai jelek ini kan, setelah beberapo tahun jadi bini kakak. Setau kakak ini hari Jum’at dek, memang ado apo,” Mang Juhai ecak-ecak dak tau tanyoan bininyo.
‘’Itulah mulutnyo bae ngomong sayang, padahal ini hari apo lagi kakak idak tau. Ini ni hari valentine kak, hari kasih sayang. Semestinyo kakak tuh kasih kalung emas, mobil, atau paling idak ngasih cokelat lah samo adek ni,” ungkap Bik Jubai dengan rai agak merengut. ‘’Oh hari kasih sayang itu maksudnyo. Adek yakin bae, sampe mati, kakak masih sayang samo adek. Bahkan idak katek duonyo, selain saingan dengan Mac Dul,” rayu Mang Juhai.
‘’Jadi hadiah untuk adek makmano. Dek dak usahlah nak ngerayoke hari valentine itu, itu tu ajaran Non Islam galo. Yakin bae, kakak ni setiap hari pengen ngerayoke hari kasih sayang dengan adek, bukan cuma tanggal 14 Februari bae. Tapi itulah, adek kan tau kakak ni idak begawe, nganggur, bahkan untuk makan keluargo bae, kito ngandalke hasil kebun uwong tuo adek. Sebangso kakak banyak duet, apo bae kendak adek, kakak belike, dak nunggu dipinta atau nak hari kasih sayang nian dek,” terang Mang Juhai.
‘’Tapi mestinyo ini biso dikatoke hari spesiallah kak,” ujar Bik Jubai. ‘’Katek hari spesial dek, segalo hari kito spesial ke galo, untuk kasih sayang antaro kakak dengan adek, samo Mac Dul. Doake bae kakak dapat gawe lemak, gaji besak, pacak kito ngerayoke hari kasih sayang setiap hari ye. Sudah, sekarang jangan merengut mak itu, tambah jelek,” kelakar Mang Juhai sambil ngusap pipi bininyo yang super cerewet itu.
‘’Yo sudah, adek idak ngarapke hadiahlah kak. Yang penting bagi adek, walaupun adek lah mulai keriput, badan tegemuk, tapi kakak masih sayang. Adek ngerti jugo kalo kakak, katek gawe, katek duet. Cuma sikok pesan adek, jangan betingkah bae, baek lagi saro sekarang, maupun sudah kayo kagek,” pinta Bik Jubai.
‘’Yo dek, kakak janji akan setiap sampe akhir hayat, oke,” tambah Mang Juhai sambil senyum-senyum. Hahaha, benar jugo kato kamu tu mang, yang biasoke hari kasih sayang itu, bukan ajaran Islam dan budaya Indonesia. Kalo dalam Islam, setiap hari pacak dirayoke hari kasih sayang itu ye. (sam)