BEBERAPO hari terakhir, Bik Jubai balek ke dusunnyo, kareno ado bahasan masalah kebon warisan dari uwong tuonyo. Apo bae kegiatan Mang Juhai, selamo bininyo cupercerewet itu mudik, simak ceritonyo sampe kelar.
Kareno ado urusan, Bik Jubai ngajak anaknyo Mac Dul, mudik ke dusun, kareno memang la dipesan uwong tuonyo. ‘’Kak, kakak tu nunggu rumah bae yo, adek samo Dul nak mudek dulu, dak lemak, kan la ditelepon oleh Ubak samo Mak adek ni,” ujar Bik Jubai. ‘’Yo dek, baleklah dulu, biar kakak jagoi rumah kito, ati-ati bae di jalan ye,” ucap Mang Juhai sambil senyum.
Sebelum masuk mobil travel, Bik Jubai langsung mbukak dompet dan ngambek duo lembar duit Rp 100 ribu dan langsung dikasih samo Mang Juhai. ‘’Nah, ini modal kakak jago rumah, untuk beli lauk dan beli minyak motor. Kami idak tau berapo lamo mudeknyo, jadi irit-irit bae dengan duet. Kagek duet la abes, kami belum balek, laju kakak tulah dak makan,” pesan Bik Jubai.
Begitu sampe di dusun sano, Bik Jubai idak berenti nelepon Mang Juhai. Kring – kring, Hp Mang Juhai bebunyi. Pas dijingoknyo, yang nelepon Bik Jubai. ‘’Assalamu’alaikum, ngapo dek,” tanyo Mang Juhai melalui telepon. ‘’Waalaikumsalam. Idak kak, nanyo kabarnyo bae, la makan belum, lauk apo,” jawab Bik Jubai sambil senyum melalui teleponnyo.
Alhasil, beberapo hari Bik Jubai mudik, melebihi minum obat tigo kali sehari, Mang Juhai ditelepon oleh Bik Jubai. Pokoknyo, subuh, pagi, siang, sore, sampe malam, Bik Jubai selalu nelepon lakinyo yang kurus ceking itu. ‘’Nah dek, lebih-lebih dari minum obat, adek nelepon kakak ni. Ngapo, idak pecayo lagi apo,” kelakar Mang Juhai.
‘’Neh kakak ni, adek bukan idak percayo, tapi bentuk perhatian samo kakak bae. Soalnyo, kalo idak ditelepon terus mak ini, lokak gawe kakak tidok bae, mbuat peta di bantal tulah,” terang Bik Jubai. ‘’Bukan apo dek, kakak bukan dak senang ditelepon, diperhatike. Tapi, apo idak dipikir, berapo pulsa adek, selalu nelepon kakak mak ini. Kalo pacak ngasih ongkos kakak bolak balek ke dusun, pulsa yang abes,” tutur Mang Juhai.
‘’Idak sampe mak itu kak, kan adek pake TM neleponnyo. Paling TM pagi atau malam, terus nelepon sepuasnyo ke nomor kakak. Makonyo adek nelepon terus idak masalah. Kemudian, yang adek telepon kan, Cuma nomor kakak sikok itulah, bukan nomor yang biaso dipake itu,” ungkap Bik Jubai.
‘’Yo sudah kalo mak itu, terimo kasih atas perhatiannyo,” tambah Mang Juhai. Hahaha, sudahlah mang, pecak ringam ditelepon, awak memang minta perhatian. Kemudian, mikir idak kamu tuh, madaki lanang ditelepon oleh betino terus, sekali-kali mamang pulok yang nelepon bini mang, supayo kejingokan bertanggungjawabnyo. (sam)