MEMANG kacau nian Mang Juhai dan Mang Oding kali ini. Begitu diajak begawe bengkel oleh Mang Somad, tetanggonyo, Mang Juhai khususnyo malah pecak mandor. Makmano kisahnyo itu, baco bae ceritonyo sampe selesai.
Beberapo hari lalu, Mang Somad yang kebetulan dapat borongan dandani mobil, ngajak Mang Juhai dan Mang Oding, untuk melok dio begawe. ‘’Kando, daripado kamu beduo katek gawe, kebetulan aku ado borongan dandani mobil, kamu melok aku bae, ngenek. Yo kalo memang masalah gaji, tenang bae, pasti aku kasihlah, idak akan ngecewake,” ujar Mang Somad.
‘’Boleh jugo ajakan kau itu Mad, galaklah kami, daripado nganggur terus mak ini,” jawab Mang Juhai. ‘’Nah, mak itulah kalo bedulur tuh Mad, ajak-ajak kalo dapat rezeki, pacak bebagi kito, idak akan ngurangi jatah kau lah,” timpal Mang Oding. ‘’Yo sudah mulai besok kito begawe ye. Kagek aku bawak ke rumah bae mobil yang nak didandani itu, biar lemak kito begawe. Terus, kapan nak makan siang, kamu beduo pacak balek ke rumah, idak ngerepoti aku,” terang Mang Oding.
‘’Jadi fasilitas apo yang kau kasih dengan kami ni Mad, harus jelas, jangan dianggap bedulur galo, tapi katek yang dienjuk,” ungkap Mang Juhai. ‘’Benar itu Mad, jika perlu harus ado itam diatas putihnyo kito. Soalnyo, kalo sekadar nak nyari pahalo, lemaklah kami bersihke masjid atau gorong-gorong bae, jelas barang nyo,” tutur Mang Oding.
‘’Yo Cuma makan bae kando, idak aku tanggung. Kalo kopi, rokok dan cemilan, pokoknyo ado, aku makan kamu makan,” jelas Mang Somad. Tapi itulah, duo hari begawe melok Mang Somad, ternyato walaupun duo sohib kental itu kenek, tapi yang capek malah Mang Somad dewek. Keduonyo sibuk ngopi, merokok, dan tidok-tidokan, sementaro Mang Somad yang dandani mobil borongan.
‘’Wah, ini yang dak cocok kando, kamu beduo tu aku ajak ngenek, ini kamu nyantai, aku yang sibuk begawe. Laju pecak mandor aku, kamu beduo tu kando,” kelakar Mang Somad. ‘’Kalo aku masih ado nolongnyo Mad, walaupun ngambek-ngambek barang yang dibutuhke. Kalo kando kito itu, memang pecak mandor nian Mad,” jawab Mang Oding sambil noleh kearah Mang Juhai.
‘’Neh kau ini Somad, pacak berutuk bae. Kando ni bukan mandor, tapi ngawasi kamu begawe. Kalo beduso pulok kau nak nyuruh-nyuruh aku Mad, aku ni la tuo, kualat kagek kau,” tutur Mang Juhai sambil senyum-senyum. ‘’Payah berurusan dengan uwong tuo ini, ngadu umur terus, saro kito dibuatnyo. Kito yang bos, malah kito jadi kenek dibuatnyo,” tambah Mang Somad senyum-senyum. Hahaha, benar itu mang, duo kando kamu tuh memang kenek, tapi nak nyuruhnyo susah kareno ngadu tuo, takut kualat pulok kito.(sam)