MANG Juhai dan Mang Oding, tekejut setelah baco berita, ado duo uwong, yakni pejabat dan mantan pejabat di Sumsel, yang ditahan penyidik Kejati di provinsinyo. Apo pendapat keduo sohib kental itu, dengan penahanan keduo uwong besak tersebut, baco ceritonyo sampe selesai.
Pagi kemaren, pecak biaso tulah, Mang Juhai dan Mang Oding, walaupun buntu, masih tulah nak baco Koran, nak nyantai sambil ngopi dan merokok. Bahkan, Bik Jubai tekadang tepakso goreng pisang atau ngerebus ubi, untuk sarapan bagi Mang Juhai, tapi Mang Oding galak nebeng jugo. ‘’Itulah kamu be-2 ini, samo nian, bukannyo nak nyari gawean, malah sibuk baco Koran tiap pagi,” rutuk Bik Jubai.
‘’Nah yuk, kami ni baco Koran, nak nyari gawe jugo yuk. Cuma kalo gawe baco mak ini, idak begaji bae bedanyo,” kelakar Mang Oding. ‘’Sudahlah Ding, memang mak itu nian ayuk kau tuh, idak usah diladeni,” sindir Mang Juhai. ‘’Memang kamu beduo itu, makan nak lemak, pecak gaya toke galo, Cuma begawe dak galak. Malahan nak merokok bae, selalu minta dengan bini,” teriak Bik Jubai sambil lari menuju dapur.
‘’Kando, heboh nian pecaknyo ini, ado berito duo uwong, pejabat dan mantan pejabat di provinsinyo, yang ditahan penyidik Kejati ini. Makmano pendapat kando dengan penahanan ini,” ujar Mang Oding, sambil nunjukke berita dikoran yang dipegangnyo. ‘’Yo nian Ding, bahayo itu. Ngapo uwong la nak pemilu, ado bae yang buat heboh. Sikok pejabat aktif, sikok mantan pejabat yang keno tahan,” tutur Mang Juhai.
‘’Tapi itulah kando, ado dulu mantan pejabat jugo, waktu keluar penjaro sempat ngomong ‘Kalo belum masuk penjaro tuh, belum lanang, dan belum jadi pejabat’. Kalo memang kasusnyo tebukti nian, yo kito dukung, jika perlu benyukke nian pejabat-pejabat korupsi itu. Tapi ingat, kalo memang pejabat-pejabat itu idak besalah, yo kito harus fair, mereka jugo harus kito bebaske, kareno cukup sudah keluargonyo tesikso,” kato Mang Oding.
‘’Makonyo aku dak galak jadi pejabat tuh Ding. Soalnyo segalo langkah, apolagi kebijakan kito, akan jadi patokan. Kalo kito salah buat kebijakan, pacak kito tesandung kasusnyo. Kadang kito makan duetnyo idak, malah keno jugo, kareno kebijakan kito saat menjabat tadi. Tapi kalo aku ndugo, duo uwong itu biso jadi korban politik. Namun, siapo yang ngorbanke mereka, kito idak tau jelas Ding,” ungkap Mang Juhai.
‘’Aku sebenarnyo ngefans dengan mantan pejabatnyo itu kando, kareno setahu aku track recordnyo lumayan bagus. Tapi dak taulah, segalonyo pacaklah waktu buktikennyo. Semoga bae keluargo mereka tabah dengan ujian ini,” jelas Mang Oding. ‘’Dak taulah kito Ding, bagus nian apo nian segalo pejabat ini. Kadang idak bebuat bae, uwong galak salah, apolagi memang bebuat nian,” tambah Mang Juhai. Hahaha, semoga bae, bapak-bapak itu buka-bukaan disidangnyo mang, jadi tau nian korban politik apo idak mereka itu. (sam)