MANG Juhai dan Mang Oding, dapat gawean baru dari caleg idolanyo. Setelah putar otak, keduo sohib itu dapat jugo solusi dari gawean itu. Makmano kisah lengkapnyo, baco ceritonyo dibawah ini yo.
Ketiko keduo sohib itu lemak ngobrol di pos ronda, sembari nerangke visi-misi caleg idolanyo, tibo-tibo Hp Mang Juhai bebunyi. Pas dijingoknyo ternyato yang nelepon itu, caleg idolanyo, dimano Mang Juhai dan Mang Oding, jadi timsesnyo. ‘’Assalamu’alaikum kando, lagi dimano sekarang,” ujar sang caleg melalui telepon.
‘’Wa’alaikumsalam Pak Caleg, kami lagi nongkrong di pos kamling atau pos ronda dekat rumah ini, biasolah lagi sosialisasi tentang kamu tulah. Ado apo nian bos sampe nelepon anak buah ini,” tanyo Mang Juhai. ‘’Idak katek penting nian kando, Cuma nak minta tolong dengan kamu beduo tuh, kareno ado yang nak dicarike dikit ini,” kato calegnyo lagi.
‘’Memang nak nyari apo nian bos, kalo biso kami carike, apo yang idak untuk kamu tuh. Waktu siang malam, kapanpun selalu siap kalo untuk bantu bos tuh sekarang,” kelakar Mang Juhai. ‘’Ini kando, makmanolah ye, aku ni lagi nyari tim sosialisasi lagi, selain kando-kando yang ado. Soalnyo, dapil kito kan besak, apolagi mencakup berapo Kabupaten dan Kota, jadi perlu tambahan uwong ini,” tutur caleg itu.
‘’Butuh berapo banyak tim sosialisasinyo bos, kalo pacak kami carike,” terang Mang Juhai. ‘’Yo agak banyak kando, sebab biso jadi nak kito tempatke di daerah-daerah pemilihan kito langsung. Cuma aku pengennyo tim itu, perbanyak betinonyo kando. Atau istilah sekarang ini, aku butuh SPG sekarang kando,” ungkap caleg tersebut.
‘’SPG yang cakmano maksud kamu tuh bos,” Mang Juhai balek betanyo. ‘’Yo SPG itu maksud aku ‘Sales Politik Girl’ kando atau sales betino yang biso ngomong politiklah walaupun dikit-dikit. Jadi, SPG ini biso kito ajak keliling, untuk nyebarke visi-misi kito ke public, agar pemilih tau kalo kito nak jadi caleg yang serius, bukan nak ngejar materi bae,” terus caleg itu.
‘’Yo sudah kami carike kalo mak itu,” jelas Mang Juhai. ‘’Yo sudah mokasih kando sebelumnyo,” tukas caleg itu. ‘’Oke samo-samo bos,” tegas Mang Juhai. Setelah nerimo telepon, Mang Juhai konsultasi samo Mang Oding, siapolah kiro-kiro yang biso dijadike SPG untuk caleg mereka itu. ‘’Nah aku ado ide kando, kan selamo ini kito banyak kenal kawan-kawan biduan OT, tapi bukan yang seronok nian,” ujar Mang Oding.
‘’Maksudnyo untuk apo Ding,” kato Mang Juhai. ‘’Nah biduan itulah, kito jadike SPG untuk caleg kito kagek. Kan dio biso kito kuliahi dulu, biar tahu makmano nyampeke visi-misi caleg kito dengan warga. Selain itu kan, kapan ado acara di tempat dio, sosialisasi, kan SPG biduan itu, biso jugo kito suruh nyanyi bareng selagu duo lagu kando. Dengan mak itu, pasti warga senang,” terang Mang Oding.
‘’Mantap ide kau kali ini Ding. Sudah kalo mak itu, kito langsung ke posko bae, terus kito jelaske rencano kito itu. Semoga bae caleg kito itu setuju yo,” tutur Mang Juhai. ‘’Yo sudah kalo mak itu kando, jangan tunggu lagi, berangkat kito,” tambah Mang Oding. Hahaha, la benar jugo kato kamu tu mang, biduan jadi SPG caleg. Tapi, boleh jugo ye, kalo sekarang dibuat SPG caleg mak itu, kreatif jugo berarti caleg itu mang. (sam)