MANG Juhai dan Mang Oding, langsung nelepon kawannyo yang wartawan Palembang Pos itu, Triono, setelah tahu Koran kawannyo itu, jadi pemenang perwajahan Koran metro terbaik dari seluruh Koran Grup Jawa Pos. Makmano itu mang, baco bae ceritonyo sampe kelar.
Pagi-pagi kemaren, Mang Juhai dan Mang Oding, langsung baco Koran kesenangannyo Palembang Pos. Pas tebukak halaman satu, Mang Juhai dan Mang Oding, laju tebaco berita kalo Koran yang dipegangnyo itu, baru dapat penghargaan sebagai perwajahan Koran metro terbaik dari seluruh Koran di grup Jawa Pos. Lomba itu dibuat dalam anugerah Dahlan Iskan Award ke-6, bagi seluruh Koran grup Jawa Pos.
‘’Woi Ding, bolehlah Koran langganan kito ini, pacak jadi pemenang dengan perwajahan koran metro terbaik ye, lomba ini se-Indonesia Ding. Idak malu lagi kito ngaku sebagai kawannyo Triono yo, buktinyo memang budak Palembang Pos itu, kreatif galo Ding yo,” ujar Mang Juhai. ‘’Benar kando, bolehlah mereka pacak menang, padahal banyak saingannyo, kareno se-Indonesia ini kando,” tutur Mang Oding.
‘’Makmano mereka pacak melok itu ye Ding,” tanyo Mang Juhai. ‘’Ngapo nak nanyo dengan aku itu kando. Tanyo dengan Triono bae, kawan kito wartawan Palembang Pos itu, biar lebih jelas kando,” saran Mang Oding. ‘’Benar jugo ide kau Ding,” kato Mang Juhai sambil tangan mencet Hp, kareno nak nelepon Triono, kawannyo yang wartawan Palembang Pos itu.
‘’Assalamu’alaikum kando, apo kabar, tumben nelepon,” ucap Triono melalui Hp. ‘’Wa’alaikumsalam. Selamat Dindo yo,” ujar Mang Juhai. ‘’Selamat apo kando, ado apo ini,” tanyo Triono bingung. ‘’Yo selamat, sebagai pemenang perwajahan Koran metro terbaik dari seluruh Koran grup Jawa Pos se-Indonesia lur, lantas selamat apo lagi, kamu jugo idak do kawin lagi kan,” kelakar Mang Juhai.
‘’Oh yang itu, mokasih kando. Ini semua kareno dukungan seluruh kawan-kawan Palembang Pos, sampe dukungan pembaco dan kawan-kawan lain, termasuk dari kando beduo,” tutur Triono. ‘’Lantas makmano pacak menang itu dindo,” tanyo Mang Juhai. ‘’Yo melok lomba kando, dalam rangkat Anugerah Dahlan Iskan Award, dan kito sebagai salahsatu pemenangnyo kando,” terang Triono.
‘’Okelah, semoga Palembang Pos semakin jaya dan semakin sukses dimasa mendatang lur yo,” terang Mang Juhai. ‘’Aamiin, terimo kasih kando atas doanyo. Sebab, Palembang Pos jugo masih butuh pembaco setia pecak kando-kando tulah, supayo Koran kami ni biso terus eksis di Sumsel ini,” tambah Triono. Hahaha, jadi sekarang idak malu lagi ngakui kawan budak Palembang Pos mang yo, setelah tahu kualitasnyo sebagai pemenang perwajahan Koran metro terbaik mak itu. Hehehe. (sam)