MANG Juhai dan Mang Oding, setengah idak pecayo dengan berita yang terbit di Koran beberapo hari terakhir. Soalnyo ado bini mantan pejabat di kotanyo, yang diduga terlibat pidana dan apolah. Makmano kisah lengkapnyo, simak ceritonyo sampe selesai.
Begitu baco Koran beberapo hari terakhir, Mang Juhai dan Mang Oding, idak berenti tebaco ado bini mantan pejabat di kotanyo, yang diduga terlibat kasus pidana. ‘’Nah makmani ini Ding. Setahu aku bapak mantan pejabat itu, bagus uwongnyo. Bahkan, bapak itu dulu jadi panutan, dan hampir dak katek berita jeleknyo, selain masalah dengan bininyo. Ngapo ini rusak namonyo oleh bini lainnyo ini,” ujar Mang Juhai.
‘’Benar kato kamu tu kando, aku bae dulu penggemarnyo bapak itu, kareno caronyo berbuat untuk kota ini, termasuk idak katek apo nak nyari duitnyo. Namun, kini kerjo keras bapak itu selamo ini, seolah redup, oleh ulah bininyo yang lain ini. Sangat disayangke nian kando, aku takut kagek warga nganggap bapak itu macam-macam. Padahal aku yakin, kalo bapak itu nian, rasonyo idak akan berbuat mak itu,” tutur Mang Oding.
‘’Sepakat aku Ding. Selain memang mantau bapak itu sebagai idola dulunyo, kawan-kawan dan bawahannyo jugo banyak ngakui kalo bapak mantan pejabat itu, bagus, memang berjuang bangun kota kito, samo idak katek nyari duet. Bahkan, kabarnyo dulu, sampe nak akhir jabatan jugo katonyo masih buntu, rumah lagi untung ado warisan. Ibaratnyo idak sesuai dengan jabatannyo, untuk kekayaan yang dio punyo itu,” ungkap Mang Juhai.
‘’Makonyo kando, ado jugo yang ngomong bapak kito itu, rusak oleh bininyo yang itulah, bukan bini yang lamo. Bahkan, aku jugo idak nyangko, ibu bininyo itu, berani nian kalo memang tebukti bebuat pidana, mulai dari dugaan korupsi, sampe nipu warga untuk berangkat umroh mak itu. Tapi aku yakin, bininyo itu belum tentu mak itu jugo kando, biso jugo kareno pengaruh lainnyo, misal dari musuh lamonyo,” terang Mang Oding.
‘’La benar pulok Ding, biso jugo kareno pengaruh musuh lamonyo, yang sudah jadi pejabat mak ini ari yo. Tapi, mudah-mudahan kasusnyo cepat terungkap, biar tau siapo salah dan siapo benar. Kalo memang idak tebukti kan, pacak namo baik ibu itu terutamo bapak kito lamo itu, pacak dipulihke Ding,” ungkap Mang Juhai. ‘’Semoga bae kando ye,” tambah Mang Oding. Hahaha, semoga bae ibu bini bapak kito itu memang idak bebuat mang ye, kasihan jugo dengan bapak idola kito dulu itu ye. (sam)