MANG Juhai dan Mang Oding lagi-lagi geleng kepalak, pas baco berita, ado oknum Pamen Plisi yang diduga bebini lagi. Apo yo alasan pamen itu sampe mak itu, baco bae pendapat duo sohib kental ini selengkapnyo.
‘’Nah kando, ado apo nian ini, madaki oknum pamen plisi disini, dilaporke kasus nelantarke bini. Ruponyo, yang ngelapor itu ngaku bini siri atau bini dibawah tangan oknum itu,” ujar Mang Oding. ‘’Yo Ding, aku bae tekejut, madaki pacak mak itu. Setahu aku, bapak plisi itu bagus uwongnyo, jadi panutan nian dari bawahannyo. Aku lamo kenal dengan bapak plisi itu Ding,” kato Mang Juhai.
‘’Yo nak makmano lagi kando, ini ado laporannyo jelas nian. Soalnyo, aku jugo idak yakin bapak plisi itu mak itu kando. Selamo ini, yang aku tau dari dio, termasuk dari mantan anak buahnyo, bagus nian jugo uwongnyo, idak macem-macem,” tutur Mang Oding.
‘’Ai dak ngerti jugo kito Ding, namonyo manusio, pasti ado tulah khilafnyo. Tapi aku masih dak yakin dengan betino yang melapor itu, biso jugo ado maksud laen Ding ye, tapi kito bae idak tau,” ungkap Mang Juhai. ‘’Tapi dibalek itu, kapan betino berani melapor mak itu, pasti ado pegangan kuat dari dio akan kebenaran laporannyo. Kalo dak mak itu, pacak dipenjaro betino itu, kareno laporan palsu,” terang Mang Oding.
‘’Andai bapak plisi kawan lamo kito itu memang kawen lagi, apo kiro-kiro penyebabnyo Ding. Kan pasti ado alasanlah kalo memang dio melakuke itu,” tanyo Mang Juhai. ‘’Biso jugo kareno khilaf tadi kando. Tapi, biso jugo kareno idak cocok lagi dengan bini lamonyo,” jawab Mang Oding.
‘Aku kasian jugo dengan bapak plisi kawan lamo kito itu, tau nian aku dengan bapak itu, idak pernah macem-macem uwongnyo. Kemudian, aku kasian jugo dengan karirnyo, yang mungkin akan mandek, kapan tebukti gawenyo bebini lagi mak itu, apolagi tanpa persetujuan bini lamonyo Ding,” urai Mang Juhai.
‘’Samo berarti pikiran kamu dengan pikiran aku kando. Aku jugo kasihan dengan bapak plisi kawan lamo kito itu, kareno aku kenal banyak nian dengan bapak itu, yang selamo ini agak lurus jugo temasuk uwongnyo,” tutur Mang Oding. ‘
’Kito bedoa bae, itu idak tebukti, dan semoga karir bapak plisi kawan lamo kito itu bagus sampe jadi Jenderal Ding ye, aamiin,” tambah Mang Juhai. Hahaha, tapi dibalik itu, betino itu, harusnyo selain pintar ngurusi gaweannyo untuk nyari nafkah, jugo harus pintar ngurusi lakinyo, biar idak belari mang, benar kan. (sam)