MANG Juhai dan Mang Oding, bingung harus berbuat apo lagi. Sebab, selain caleg yang janji nak bantu pembangunan jalan di lorongnyo idak datang-datang, warga kampungnyo jugo selalu nanyo pembangunan itu. Makmano pacak mak itu mang, simak bae ceritonyo sampe kelar ye.
Waktu terus bejalan, bahkan tinggal itungan hari lagi nak Kampanye dan Pemilihan Legislatif (Pileg), namun caleg idola Mang Juhai dan Mang Oding, idak nongol-nongol lagi, untuk nemui warga di kampungnyo, untuk minta bantu suaro. ‘’Yo kando, makmano janji caleg kito itu ye, katonyo nak datang lagi nemui warga kampung kito,” ujar Mang Oding.
‘’Nah dak tau jugo aku Ding, memang katonyo waktu datang itu cak iyo-iyo nian nak bantu bangun jalan di lorong kito ini. Selain caleg kito idak datang, warga disini jugo la nanyo terus dengan kito, kapan caleg itu nak bangun jalan,” kato Mang Juhai. ‘’Anehnyo, kapan ditelepon nomor caleg itu banyaklah dak aktif kando. Kapan aktif, dijawab, ngaku lagi diluar kota,” tutur Mang Oding.
‘’Memang aku idak yakin lagi, caleg kito itu nak bantu bangun jalan Ding. Soalnyo, dio ngomong sudah kecewa dengan kito, gara-gara ado caleg laen masuk ke kampung kito, sudah bantu jilbab dan sembako. Tapi aku omong dengan dio, selagi kamu bantunyo lebih besak dan lebih beguno, misak pecak bangun jalan itu, aku yakin warga kampung kito akan nolong suaro ke dio,” ungkap Mang Juhai.
‘’Benar itu kando. Selain itu, Pak RT disini idak katek apo-aponyo dengan kando, menang jabatan bae. Soalnyo, kalo urusan coblos kagek, masih pecayolah warga dengan kito kando. Sebab apo, kito la banyak bukti yang nguntungke masyarakat, bahkan Cuma ngambek untung sedikit nian dari bantuan caleg ke warga itu. Idak pecak Pak RT kito, yang motong sampe 50 persen dari bantuan,” jelas Mang Oding.
‘’Itulah Ding, la kando jelaske jugo dengan caleg kito itu, tapi dio meraso la kecewa. Makonyo sekarang aku tediam bae, pasrah, terserah dio nak makmano. Oleh aku bae dak galak jawab, pas dio nelepon ngomong mak itu. Memang dio bae yang meraso kecewa. Kito yang sudah besiget nolong dio, malah dikecewakan caleg kito. Belum lagi warga selalu taunyo dengan kito Ding, ngapo dak pening kito,” tukas Mang Juhai.
‘’Mak inilah resiko kito kando dengan caleg. Kapan lagi penting bae, dio nak ndekati kito. Sekarang malah njauh. Jangankan nak ado bantuan dan ingatan ke kito, ucapan terimo kasih bae idak kando,” ujar Mang Oding. ‘’Ini jadi pelajaran kito Ding, berarti kedepan kito harus selektif dukung caleg, jangan sampai mak ini, kito dikecewakan caleg,” tambah Mang Juhai. Hahaha, biasolah yang mak itu mang, memang kamu bae yang dibuat mak itu, yang lain banyak jugo dibuat pecak kamu tu mang. (sam)