KARENO dengar koran kebanggaannyo Palembang Pos, nak ngadoke acara try out yang dihibur artis jebolan ajang pencarian bakat di TV swasta nasional, Mang Juhai laju berejo nak nyamar jadi budak SMA. Apo tanggapan Mang Oding, dengan rencano gilo Mang Juhai itu, berikut kisahnyo.
Begitu baco koran bakal ado try out menjelang Ujian Nasional bagi budak SMA dan SMK se-Sumsel, Mang Juhai laju pengen melok. Soalnyo, selain acara try outnyo, panitia jugo bakal ngadirke artis Fatin Shidqia Lubis, budak SMA pemenang acara pencarian bakat disalah sikok stasiun TV swasta nasional, untuk menghibur peserta kageknyo.
‘’Nah bagus ini Ding, bakal ado artis Fatin ke kota kito ini, katonyo dihadirke panitia dari koran langganan kito Palembang Pos. Fatin ini nak ngibur peserta try out yang diadoke Palembang Pos, untuk 3-5 ribu pelajar SMA dan SMK se-Sumsel. Acaranyo di OPI Convention Center Jakabaring Ding. Ai pacak kito datang kesano kalo mak itu,” ujar Mang Juhai.
‘’Makmano caronyo itu, nak datang kando, kito ni bukan budak SMA atau SMK lagi. Kalo kagek sampe depan pintu, kito diusir oleh panitia bae,” kato Mang Oding. ‘’Lah Ding, jangan pendek nian akal kau ini. Kito nyamar sebagai budak SMA Ding, kito daftar jadi peserta try out, kan cuma bayar Rp 25 ribu, idak beratlah Ding,” jelas Mang Juhai.
‘’Ya ya ya kando, nak nyamar jadi budak SMA, alangkah lucunyo kando. Dak ingat umur apo kando tu, la tuo kando, la bejenggot, kumis lagi la ubanan, mano pecayo lah panitia. Tapi, aku jugo sebenarnyo pengen ketemu artis Fatin itu kando, idola aku jugo budak itu. Masih kecik, duet banyak, tekenal pulok. Sementaro kito, jangankan nak beduet, gawean lagi dak dapat-dapat sampe sekarang,” ungkap Mang Oding.
‘’Pokoknyo segalo caro kito cubo Ding, kareno nak ketemu artis idola. Siapo tau dengan gaya kito nyamar jadi budak SMA mak ini, biso berhasil masuk dan nonton konser Fatin disano Ding. Jarang-jarang Fatin ke kota kito, apolagi dio masih sibuk sekolah. Jadi inilah kesempatan kito, jingok dari dekat idola kito itu Ding,” urai Mang Juhai.
‘’Oh iyo kando, awalnyo kito nyamar dulu jadi budak SMA yo. Nah kalo la dak pacak nian masuk, kito baru ngubungi kawan kito yang wartawan Palembang Pos itu kando. Aman lah itu kalo mak itu kando, pacak kito nonton Fatin,” tegas Mang Oding semangat. Hahaha, ingat umur Mang Juhai, nak nyamar jadi budak SMA awak kumis lagi la ubanan pecak kato Mang Oding nian tu. (sam)