MEMANG banyak nian cerito lucu, kalo sudah tesebut namo Mang Juhai dan bininyo yang supercerewet Bik Jubai. Apolagi cerito mereka yang langkah kali ini, baco kisahnya sampe selesai.
Beberapo hari kemaren, Bik Jubai becarian dengan Hp-nyo yang tibo-tibo dak katek di rumah. ‘’Kak, ado jingok Hp aku idak yo, perasaan aku tarok di kamar, tapi ngapo katek lagi yo,” tanyo Bik Jubai samo lakinyo yang kurus ceking Mang Juhai. ‘’Nah dek, idak jingoklah kakak, ingat-ingat bae lagi, siapo tau adek lupo naroknyo dimano,” kato Mang Juhai.
‘’Aku yakin nian kak, sebelum kito ke rumah dulur kito di Sekojo yang nak berangkat umroh itu, aku tarok Hp di pucuk lemari kamar. Sebab, seingat aku, pas kito yasinan nak berangkat umroh dulur kakak itu, aku dak bawak Hp. Apo Hp adek dikucaki Mac Dul yo atau dipaling uwong kak. Cubo tolongi nyarinyo dulu kak,” pinta Bik Jubai.
‘’Setau aku Mac Dul dak penah ngucaki Hp kamu yang la agak buruk itu. Kemudian, siapo pulok nak maling Hp mak itu dek, paling laku dijual Rp 50 ribu. Besaklah duso malingnyo, daripado hasil jualnyo,” kelakar Mang Juhai. ‘’Serius aku ni kak, bukan masalah Hp-nyo kak, tapi banyak nomor telepon pejabat penting di Hp itu,” ucap Bik Jubai senyum-senyum.
‘’Kelakar kamu dek, awak Cuma ado nomor Ubak dan Umak di dusun tulah, paling nomor keluargo. Darimano bucunyo adek kenal pejabat penting. Kalo di Hp kakak, memang ado dikit-dikit nomor telepon pejabat, paling idak nomor telepon Lurah dan nomor caleg. Walaupun akhirnyo dibudike jugo oleh caleg itu,” ungkap Mang Juhai.
Duo hari setelah itu, ternyato keluargo Mang Juhai yang lagi berangkat umroh ke tanah suci, sempat nelepon ke Palembang. Selain ngenjuk kabar dengan Mang Juhai, dio ngomong Hp siapolah yang itam buruk di tasnyo itu. ‘’Aku heran, ngapo ado Hp di tas aku, idak tau punyo siapo,” ujar dulurnyo yang betino lagi umroh itu betanyo samo Mang Juhai.
‘’Oy yuk, itu Hp adek kamu Jubai. Untung bae idak ayuk angkat pas aku nelepon, dak tu besak keno roaming aku ni. Yo sudah simpan bae yuk, Hp Jubai itu,” terang Mang Juhai sambil nutup telepon. ‘’Apo dio kak,” tanyo Bik Jubai. ‘’Dek Hp kamu tu melok umroh ruponyo. Itulah kalo pelupo. Adek tarok Hp itu di tas ayuk, waktu yasinan di rumahnyo, sebelum dio umroh,” jelas Mang Juhai.
‘’Oh iyo kak, baru ingat adek, kalo waktu yasinan itu, adek duduk dengan ayuk nian. Mungkin idak sengajo narok Hp dalam tas dio, kareno tas dio dengan tas adek dekatan waktu itu. Nah, laju melok umroh kak yo Hp adek,” ungkap Bik Jubai. ‘’Iyo Hp-nyo bae tapi melok umroh, kalo uwongnyo belum,” tambah Mang Juhai. Hahaha, bolehlah hebat nian Hp Bik Jubai, kalah uwongnyo. Lah, Hp-nyo la berangkat umroh, sementaro pemilik Hp dewek, dak tau ado panggilan apo idak dari Tuhan, untuk berangkat umrohnyo. (sam)