KARENA katek gawean itu, laju Mang Juhai dan Mang Oding, diajak adeknyo Mang Oding yang pengusaha bengkel itu ke dusun mereka, yang Cuma bejarak beberapo jam dari kotanyo. Apo bae oleh-oleh mereka dari dusun Mang Oding itu, ikuti ceritonyo sampe kelar.
Siang kemaren, Mang Juhai lagi lemak nonton Tv di rumahnyo, didatangi Mang Oding. ‘’Kando, daripado manyun di rumah, payo melok kami ke dusun bae. Adek aku ngajak berangkat pake mobilnyo, kareno sekalian nak ngantar dulur mamak kesano,” ajak Mang Oding samo Mang Juhai. ‘’Aku ni galak bae Ding, tapi muat idak mobilnyo,” jawab Mang Juhai.
‘’Yo muatlah kando, lagipulok dekat ke dusun kami tuh, bukan pecak dusun ayuk, nak seharian naek mobil,” jelas Mang Oding. ‘’Oke kalo mak itu, aku bebaju dulu, kagek aku nyusul ke rumah kau,” terang Mang Juhai, yang langsung masuk kamar, genti baju. Idak lamo bebaju, sudem pamit dengan Bik Jubai, Mang Juhai langsung ke rumah Mang Oding.
Sampe disano, ruponyo uwong la nak berangkat dan Mang Juhai kebagian duduk di bangku belakang samo Mang Oding. ‘’Nak agak saro kito kalo duduk miring mak ini, pacak mabuk anak mudo,” kato Mang Juhai. ‘’Sabar bae kando, peginyo bae kito duduk di belakang, balek kagek duduk depan kamu tuh. Soalnyo, tinggal kito betigo bae baleknyo,” tutur Mang Oding.
Begitu sampe dusun, ruponyo dulur Mang Oding, sudah nyiapke puluhan ikok dogan, samo kemplang untuk dibawak ke kotanya, sebagai oleh-oleh. ‘’Sudah minum la dogan dulu, salat maghrib, dan istirahat dulu, baru balek ke kota lagi,” ujar Bapak Mang Oding. ‘’Iyo Pak, kasihan dengan adeknyo Oding ini kalo langsung berangkat, capek dio nyopir dewekan,” kato Mang Juhai.
Alhasil, pas balek dari dusun, bagian belakang mobilnyo penuh dengan dogan, berapo kilo ikan idup hasil njaring, samo kemplang ikan khas dusun itu. ‘’Memang nian Ding kato uwong tuh, kalo rejeki idak akan kemano,” tutur Mang Juhai. ‘’Yolah kando, memang segalo manusio itu ado rejekinyo, walaupun idak bebentuk duet galo. Pecak ini, dogan, ikan, dan kemplang, rejeki jugo kando,” tambah Mang Oding. Hahaha, la benar pulok mang, segalo manusio itu ado rejeki galo, tinggal banyak dan dikitnyo bae. (sam)