SETELAH memasuki beberapo hari masa kampanye, mulai ado caleg dewan pusat di kota Mang Juhai dan Mang Oding, yang keabisan peluru (modal kampanye,red). Ngapo pacak mak itu mang ye, baco ceritonyo dibawah ini sampe tuntas.
Baru sekali ini, Mang Juhai dan Mang Oding, idak kolu nak nekeni caleg yang butuh suaro dan dukungan mereka. ‘’Nah Ding, saro kawan kito caleg sikok itu. Laju dak lemak pulok kito nak itung-itungan duet nian samo dio,” ujar Mang Juhai. ‘’Ai kando, katek istilah mak itu. Sekarang lagi rakyat bekuaso, siapo yang idak sepaham, kito tinggalke, masih banyak caleg lain,” kato Mang Oding sambil senyum-senyum.
‘’Tapi caleg sikok ini lain nian Ding, aku tau nian, bahkan sudah berapo kali diajak ke rumahnyo. Sempat jugo aku diajak ngobrol dengan keluargo, termasuk istrinyo yang ngeluh dan pening,” ungkap Mang Juhai. ‘’Yo nian apo kando, kagek modus para caleg bae, ngaku buntu terus nak minta tolong. Tapi, kagek setelah kito tolong, dio jadi dewan, malah lupo dengan rakyat pecak kito ini,” tutur Mang Oding lagi.
‘’Benar nian Ding, caleg sikok itu, la tejual kebon dan rumahnyo di dusun sano Ding, kareno nak melok pemilihan ini. Apolagi, dio itu melok pemilihan dewan pusat, yang banyak mato pilih, daerah, dan kampungnyo. Bahkan, kabarnyo untuk sikok kampung bae, dio biso abes sampe ratusan juta rupiah Ding. Bayangke, ado berapo kampung diwilayah mato pilih dio, termasuk kampung kito,” jelas Mang Juhai.
‘’Tapi, benar jugo kalo dipikir kando. Berarti caleg itu, besak pasak dari tiang kando. Cuma nafsu nak jadi dewan pusat, tapi idak diimbangi dengan modal. Madaki, baru beberapo hari kampanye, la abis peluru (modal,red). Sementaro kampanye masih beberapo hari lagi, belum kagek nak pencoblosan, dan ndueti saksi kando,” terang Mang Oding.
‘’Yo Ding, bakal saro kawan kito itu, lemak kito jauhi bae Ding, daripado ketempoan. Bayangke, sekarang la abes peluru, kebon dan rumah di dusun tejual. Makmano dio nak serangan fajar dan mbayari saksi kagek, lokak dibudikennyo bae kito Ding. Sisip dikit, jadi dewan la idak, harto abes tejual, ujungnyo masuk rumah sakit (RS) jiwo kawan kito itu Ding. Bahayonyo lagi, kalo kito tetular Ding,” kelakar Mang Juhai.
‘’Yo nian kando, lemaklah kito mundur teratur bae, banyak caleg laen pacak kito ajak kerjosamo, daripado neruske ndekat caleg itu. Segalo barang la dijualnyo, untung bae idak hargo diri dan kuburan nenek moyangnyo dijualnyo kando,” urai Mang Oding. ‘’Benar nian Ding, sisip dikit pacak nian tanah kuburan neneknyo dijual pulok, kalo dio la pening,” tambah Mang Juhai. Hahaha, idak sejauh itulah mang, madaki teko tanah kuburan nak dijual pulok. Hehehe. (sam)