ENTAH ngapo, ruponyo keduo tangan Mang Juhai agak nyeri dan sakit. Setelah diselidiki, diduga bekas kseleo lamo di tangannyo kambuh, kareno dulu dak pernah diobati. Lantas apo yang dilakuke Mamang kito ini, dengan keduo tangannyo itu, baco ceritonyo dibawah ini.
Beberapo hari kemaren, Mang Juhai sering ngeluh kalo keduo tangannyo agak nyeri dan sakit. ‘’Ngapolah dek yo, keduo tangan kakak nih agak nyeri dan sakit. Padahal begawe berat idak pulok, bahkan paling Cuma ngendong Mac Dul bae,” ujar Mang Juhai. ‘’Nah dak tau aku kak, biso jadi kseleo atau apo, tanyo ke dukun sano supayo jelas,” kato Bik Jubai.
‘’Oh yo, biso jadi kseleo lamo belum sembuh, sekarang kambuh dek. Soalnyo dulu keduo tangan kakak nih, sering kseleo kareno sering maen volley. Maklumlah dek, kakak ni dulu di dusun jadi atlet volley andalan,” ujar Mang Juhai dengan gaya meyakinkan. ‘’Terserah nak atlet atau apo, yang jelas kakak tuh sakit, kapan tangan nyeri mak itu,” tutur Bik Jubai.
‘’Makmanolah kiro-kiro untuk ngobati ini dek,” tanyo Mang Juhai lagi samo bininyo yang supercerewet itu. ‘’Yo kak, kebetulan ado kakak misan adek lagi kesini, tempat dulur kito diseberang sano. Cubo kagek adek panggil dio bae, biar kakak berurut dengan dio. Dio tuh pacak ngurut kak, nulari ilmu kakek dulu. Tapi dio dak galak jadi pencarian, paling kalo uwong minta tolong bae diurutkennyo,” jelas Bik Jubai.
‘’Sudah kalo mak itu, panggil bae dek,” ungkap Mang Juhai. Setelah ditelepon Bik Jubai, sang kakak misannyo itu, langsung datang ke rumah mereka. Sudah nyiapke minyak, sang kakak misan atau kakak ipar Mang Juhai ini, langsung ngurut keduo tangan Mang Juhai. ‘’Kau ni kseleo lamo kambuh lagi, makonyo kapan kseleo itu diurut dan diobati, biar idak kambuh mak ini,” jelas sang kakak misan tadi.
‘’Yo kak, memang dulu galak maen volley. Jadi kapan kseleo dikit-dikit ditahan bae, paling berapo hari sembuh dewek. Ruponyo jadi kambuh terus sampe sekarang,” terang Mang Juhai. Setelah diurut, Mang Juhai nyuruh bininyo Bik Jubai ngasih duet untuk sang kakak misan. ‘’Mano galak dikasih duet dio tuh kak. Paling kito belike gulo dan kopi bae, biar dio bawak balek ke dusun. Kalo kasih barang mak itu, dio dak pacak nolak,” saran Bik Jubai.
‘’Ooh dak galak nerimo dio kalo dikasih duet yo. Berarti kito berurut gratis kalo mak itu,” ujar Mang Juhai. ‘’Makonyo kito kasihke barang mak ini. Caro kakak misan sikok itu, kapan nolong idak beritungan. Bukan pecak kamu, baru nolong masak atau ngasuh Mac Dul dikit, la nak minta beli rokok, beli makan ini itu, beritungan nian dengan bini,” sindir Bik Jubai. ‘’Idak itungan nian dek, paling ado hasil bae,” tambah Mang Juhai. Hahaha, alangkah lemak kamu Mang, yang disuruh ngurut kakak ipar, terus gratis pulok. (sam)