GARA-gara balek kesorean dari jalan-jalan, Mang Juhai dan Mang Oding, laju tejebak banjir dan macet. Namun, meskipun susah, tapi Mang Juhai masih sempat ngerjoi Mang Oding sore kemaren. Dimano mereka biso tejebak itu, simak bae ceritonyo sampe selesai.
Siang harinya, Mang Juhai dan Mang Oding, jalan-jalan ke Seberang Ilir. Namun, kareno ditelepon bininyo yang supercerewet Bik Jubai, tepakso Mang Juhai dan Mang Oding, balek ke rumah. ‘’Kakak, aku taunyo kakak balek sekarang jugo, banyak gawe di rumah ni,” pekik Bik Jubai melalui telepon. ‘’Oy dek, ini ni masih ujan deras, mano jas ujan la koyak-koyak pulok,” jawab Mang Juhai.
‘’Neh, dak tau aku yang mak itu, pokoknyo balek sekarang jugo,” ujar Bik Jubai. Dengan cepat, Mang Juhai dan Mang Oding balek dengan motor, setelah ujan la agak reda. Kareno mikir nak cepat, keduo sohib kental ini langsung balek lewat Jalan Kapten A Rivai. Alhasil, setelah tejebak macet, mereka malah tejebak banjir. ‘’Nah nak mati nian kito Ding,” ujar Mang Juhai. ‘’Ngapo kando,” jawab Mang Oding yang duduk dibelakang.
‘’Sudah tejebak macet, kito jugo tejebak banjir ini Ding. Ruponyo tinggi nian banyunyo ini disini, awak daerah perkantoran dan banyak bank,” tutur Mang Juhai. ‘’Iyo nian kando, lupo pulok kito, ngapolah masih nak lewat sini,” ungkap Mang Oding. ‘’Tapi iyolah, nak makmano lagi Ding, nak mundur dak pacak lagi, tepakso melok maju tulah kito, biar banjir terabas bae,” kato Mang Juhai lagi.
‘’Yolah ati-ati bae kando kito, pecaknyo didepan la banyak yang mogok, baik motor maupun mobil,” ungkap Mang Oding sambil nunjuk ke depan. ‘’Yo Ding, apo kau turun bae Ding, jalan kedepan, biar lemak aku mbawak motor, untuk nyegah mogoknyo,” ujar Mang Juhai yang bemaksud ngolahke Mang Oding. Mang Oding yang idak sadar dikerjoi, nurut bae disuruh bejalan oleh Mang Juhai.
Untunglah, sebelum jauh bejalan, Mang Oding yang jingok Mang Juhai senyum-senyum, langsung sadar kalo dio jadi bahan olokan sahabatnyo itu. ‘’Ai kando, nak ngolahke kamu tuh ruponyo. Sudah dak galak lagi aku bejalan,” ucap Mang Oding, sambil becepat naek motor. ‘’Yo sudah, naeklah sini,” jawab Mang Juhai sambil ketawo, setelah puas ngerjoi sohibnyo itu. Hahaha, makonyo ingat-ingat mang, Kapten A Rivai itu banjir nian. Meski di tempat lain jugo banyak banjir, tapi idak setinggi disano. (sam)