MANG Juhai dan Mang Oding, laju dak kelemakan dengan warga di kampungnyo. Soalnyo la betungguan bejam-jam, namun caleg yang ngomong nak silaturrahmi ke kampung mereka, malah idak nongol-nongol. Makmano kejadiannyo, kito peloki ceritonyo sampe selesai.
Sore kemaren, Mang Juhai dan Mang Oding ngumpulke warga di kampungnyo. Kumpul itu kareno ado salah sikok caleg provinsi, bukan caleg jagoan mereka nian yang nak jadi dewan nasional, katonyo nak silaturrahmi dengan warga kampung. ‘’Dulur-dulur, kito kumpul dulu bae, sebab kato caleg sikok ini, dio nak datang, sekadar silaturrahmi ke kampung kito ye,” ujar Mang Juhai mulai omongan.
‘’Yo mang, kito tunggu, tapi jangan lamo-lamo, kareno anak kami nak mandi dan dienjuk makan, mano masak makan malam lagi belum ini,” sindir salah sikok ibu-ibu. ‘’Yo Buk, pokoknyo sabar bae yo, sebentar lagi caleg kito itu pasti sampe, katonyo la di jalan,” ungkap Mang Oding bebohong dikit, kareno katek caleg itu ngomong la di jalan. Namun, bohongnyo Mang Oding, beniat baek, kareno biar warga idak resah.
Akan tetapi, setelah sampe sore sang caleg belum jugo datang, sehinggo warga menjadi resah dan meraso dibudike sang caleg. ‘’Ai kando, idak pakam pecaknyo caleg kito kali ini. Masih lemak caleg jagoan kito itulah, bejanji dan ditepatinyo nian. Makmano ini, sampe berapo jam lagi kito nunggu. Kalo memang dak nak datang, lemak ngomong bae, biar kami idak beharap,” teriak Mang Somad.
‘’Benar nian itu mang, jangan mbudike terus jadi caleg tuh. Sekali-kali tepati janji dan senangi masyarakat. Jangan nak pemilihan bae ngaku begaul, setelah jadi dewan lupo dengan pencoblosnyo,” timpal ibu-ibu semakin kesal. Alhasil, kareno la berapo jam katek kepastian datangnyo caleg itu, laju warga bubar dari rumah Mang Juhai, tempat kumpul untuk silaturrahmi.
‘’Kami balek mang ye, gawean di rumah idak teurus, ketemu caleg la idak, apolagi nak dapat apo-apo. Lemak kami balek kalo mak itu,” pekik ibu-ibu langsung bubar. ‘’Tunggulah dulu Buk, katonyo bentar lagi datang,” Mang Juhai nyubo nahan warga supayo idak bubar. ‘’Katek-katek mang, jangan kamu pecak caleg pulok, galak mbudike,” celah salah sikok ibu-ibu.
Mang Juhai dan Mang Oding Cuma tediam, kareno warga bubar. Ruponyo sang caleg baru datang setelah maghrib. Apolacur, kedatangan sang caleg, Cuma betemu dengan Mang Juhai sekeluargo dan Mang Oding. ‘’Nah mano warga kito kando,” tanyo Caleg itu. ‘’La bubar Pak, la dari siang nunggu kamu idak datang-datang, laju kami dak pacak nahannyo lagi,” tambah Mang Juhai. Hahaha, dak apo-apo mang dibuat mak itu, biar caleg idak nganggap enteng rakyat sebagai pemilih. (sam)