PEMILU legislatif (pileg) ini pecaknyo jadi berkah dewek untuk Mang Juhai dan Mang Oding. Soalnyo, setelah disuruh ngerahke massa dan nyarike saksi untuk caleg jagoannyo, kini keduo sohib kental itu dapat tugas berikutnyo dari sang caleg. Apo tugas itu, berikut ceritonyo.
Malam kemaren, begitu selesai pengitungan suaro pemilu di TPS, seluruh timses dan saksi caleg jagoan Mang Juhai dan Mang Oding kumpul di rumah sang caleg. Pokoknyo malam itu mereka begadang untuk ngerekap suaro yang didapat sang caleg. Setelah selesai diitung, ternyato caleg jagoannyo besak kemungkinan dapat kursi di dewan.
Ndengar hasil itu, sang caleg langsung nunjuk Mang Juhai dan Mang Oding, melok ketuo timses untuk ngamanke suaro mulai dari PPS, PPK, sampe ke KPU. ‘’Alhamdulillah, berarti kerjo keras kito selamo ini ado hasilnyo. Kalo idak meleset, dulur kamu ini dapat sikok kursi di dewan kagek. Nah, sekarang tugas kito tambah berat, kareno kito harus samo-samo ngawal pengitungan suaro ini, mulai dari PPS, PPK, sampe KPU,” ujar caleg jagoannyo itu dengan wajah sumringah.
‘’Syukurlah kalo mak itu lur, idak percuma kito blusukan selamo ini berarti. Semoga suaro idak berubah dan dulur kito ini jadi dewan nian. Kito jugo siap bae untuk ngamanke suaro itu, kareno takut kagek suaronyo bekurang lur,” jawab Mang Juhai dengan rai senang. ‘’Yo sudah kalo mak itu, berarti Kando Juhai, kando Oding, samo ketuo timses kito yang kami tugaske ngoordinir pengawalan suaro kito yo,” tutur caleg itu lagi.
‘’Kami oke bae lur, apo yang kami suruh kito gaweke, kareno tanggung, tugas tinggal dikit lagi. Tapi…,” kato Mang Oding sambil tangan kanan megang kepalaknyo. ‘’Yo sudah kando, jangan dipikirke, pokoknyo soal kebutuhan kamu dan keluargo selamo ngawal suaro itu ditanggung. Dak mungkin kamu di jalan makan, sementaro di rumah idak makan. Segalonyo la disiapke kando, jangan khawatir, kepalang kito la berjuang,” terang caleg itu senyum-senyum.
‘’Yo sudah Ding, katek tapi-tapian kito nih, pokoknyo gawe masih ado, jadi harus digaweke. Sebab, jangan sampe perjuangan kito selamo ini sia-sia, gara-gara suaro idak dikawal, laju berubah kageknyo. Walaupun masih jadi jugo, tapi kito rugi. Kareno kalo dulur kito belebih suaronyo, pacak dikasih dengan kawan dio separtai,” tambah Mang Juhai. “Nah benar nian itu kando,” tambah sang caleg. Hahaha, lemak kalo caleg menang mak itu mang, bagi yang calegnyo kalah, bukan dak mungkin timses pacak melok gilo. (sam)