BERBADAN kurus kerempeng, ternyato idak selamonyo jadi katoan untuk Mang Juhai. Sekali ini, Mang Juhai dikatoke uwong mirip pejabat atau tokoh nasional. Makmano itu mang, baco ceritonyo dibawah ini.
Siang kemaren, Mang Juhai nongkrong di pos ronda di kampungnyo, bersamo warga atau tetanggonyo. Disano, mereka mulai sibuk ngurusi pilpres sebelum pencoblosan. ‘’Pokoknyo, kami serahke dengan Kando Juhai dan Kando Oding tulah, nasib kami sekeluargo, dalam pencoblosan pilpres kagek,” ujar Mang Somad, salah seorang warga kampung disano.
‘’Ngapo mak itu Mad, memangnyo aku dan Oding itu siapo,” tanyo Mang Juhai. ‘’Yo kamu tulah, biso ngejoke bantuan untuk kami, termasuk untuk pencoblosan. Pokoknyo kami percayo bae dengan kando beduo. Soalnyo, kalo dengan Pak RT, kami idak pecayo lagi. Sebab, ternyato banyak nian ditetaknyo bantuan untuk warga disini,” jelas Mang Somad lagi.
‘’Yo sudah, kalo memang mak itu, kami catet dulu namo-namo warga kito. Kagek, dibagike bae, siapo jadi saksi. Tapi kami belum biso bejanji nian, kareno masih pendekatan dengan partai pengusung pilpres itu. Yang jelas, yakinlah, kami idak akan banyak motong bantuan itu, kalo memang ado. Paling sekadar beli rokok, samo setor dikitlah dengan Pak RT, biar segalo urusan kito lancar,” ungkap Mang Juhai.
Pas mereka lagi lemak cerito, tibo-tibo datang Mang Oding, langsung manggil Mang Juhai, dengan sebutan aneh dan jarang didengar selamo ini. ‘’Nah ado Pak Jokowi, capres kito disini yo,” kelakar Mang Oding. ‘’Siapo kau panggil tu Ding,” tanyo Mang Juhai heran. ‘’Yo Kandolah, siapo lagi. Kan Pak Jokowi yang Capres itu kando tuh,” terang Mang Oding masih terus senyum-senyum.
‘’Ngapo laju kau manggil aku mak itu Ding,” Mang Juhai tambah penasaran. ‘’Kan kamu tuh mirip Jokowi kando. Badan la samo, sisiran rambut jugo mirip. Cuma agak mbedake, kulit Jokowi mulus dan bersih. Sementaro kulit kando, selain kotor, juga banyak korengan. Beda lainnyo, rai Jokowi bersinar, rai kando kusut,” ujar Mang Oding sambil tepingkal-pingkal ketawo, dipeloki tetanggo yang kumpul di pos ronda itu.
‘’Kalo kamu ndoake aku pecak Pak Jokowi nasibnyo, Alhamdulillah. Tapi kalo kamu sekadar nak nguyok bae, aku terimo jugo, selagi untuk kebahagiaan kamu galo-galo,” tutur Mang Juhai dengan rai agak masem. ‘’Tapi yo nian Kando, kamu mirip Jokowi nian. Selamat kando ye, paling idak mirip, walaupun beda nasib,” tambah Mang Oding. Hahaha, la benar pulok uji kamu tuh Mang Oding, kalo kami pikir-pikir memang mirip nian ye. (sam)