MANG Juhai dan Mang Oding, tejingok lahap nian, pas diajak kawannyo makan siang, kemaren itu. Apo nian lauknyo sampe duo sahabat kental ini lahap makan, simak bae ceritonyo dibawah ini.
Siang kemaren, Mang Juhai dan Mang Oding yang lagi jalan pake motor bututnyo, tibo-tibo ditelepon kawannyo Mang Benu. ‘’Assalamu’alaikum kando, lagi dimano,” tanyo Mang Benu melalui telepon. ‘’Wa’alaikumsalam, lagi di jalan dindo, ado apo nian. Memang lalamo kamu dak nelepon, biasonyo ngajak lemak tulah kamu tu,” jawab Mang Juhai.
‘’Yo ngajak lemak kando, kamu ke daerah Bukit yo, kito makan siang dulu, pasti kamu tu la kelaparan,” kato Mang Benu. ‘’Bagus ide itu dindo, kami kesano yo, nemui kamu. nak pesan pesanlah dulu makanannyo,” ungkap Mang Juhai. ‘’Nah idak kando, nunggu kamu tulah baru pesan makan, kagek lain selera,” terang Mang Benu sambil nutup telepon.
Dak sampe 10 menit, Mang Juhai dan Mang Oding, sudah ketemu dengan Mang Benu. Ruponyo Mang Benu ngajak makan di warung pindang belakang dio nunggu tulah. ‘’Ai pecaknyo lemak pindang ini Benu, kapan yang parkir uwong bemobil galo mak ini,” kato Mang Juhai. ‘’Yo kando, tekenal jugo pindang ini, walaupun regonyo memang agak mahal dikit,” jawab Mang Benu.
‘’Nah nak mahal nak murah terserah Benu, kapan perut lapar mak ini, masih nak makan tulah. Lagipulo kan kau yang ngajak makan, jadi aman bae kami,” celetuk Mang Oding dari belakang. Begitu duduk di meja, ketigonyo langsung didekati pelayan, sambil nanyo nak pesan lauk apo dan minum apo.
‘’Aku pesan pindang tempoyak palak patin, idak tau kalo kando kito duo ikok ini. Minumnyo jeruk angat bae yo,” kato Mang Benu samo pelayan itu. ‘’Nah ado pindang tempoyak Benu yo,” tanyo Mang Juhai samo Benu. ‘’Yo kando, ado, pesanlah,” jawab Mang Benu. ‘’Kakak samoke bae dek, pindang tempoyak palak patin yo, minum teh angat bae,” kato Mang Juhai samo pelayan warung pindang itu.
‘’Kebetulan duo uwong ini la pesan itu, jadi kakak nurut bae dek yo, pindang tempoyak palak patin, biar lemak ngirupnyo,” simbat Mang Oding sambil cengengesan. ‘’Pindang tempoyak disini, paling lemak katonyo kando,” ungkap Mang Benu. ‘’Nak lokak nambah kalo mak itu dindo,” tambah Mang Juhai. Hahaha, belum tau ruponyo Mang Juhai dan Mang Oding, kalo disano ado jualan pindang tempoyak paling lemak. (sam)