MANG Juhai dan Bik Jubai, yang berencano nak melok kondangan besannyo, tambah dak kelemakan. Soalnyo, banyak fasilitas disiapke adik iparnyo, saat kawinan adeknyo kagek. Apo bae fasilitas itu, simak ceritonyo sampe abes.
‘’Yuk, kagek ayuk samo kakak, melok ye, kondangan acara kawinan adek aku kagek. Bulan Desember inilah rencanonyo yuk,” ujar adek ipar Bik Jubai bernamo Farizi, saat maen ke rumah mereka. ‘’Yo insya allah kami melok Far. Dak mungkin jugo dak datang, uwong laen bae kito sempatke, apolagi ini besan dewek kawen,” kato Mang Juhai.
‘’Makonyo kak, kakak samo ayuk tu jangan dak melok, sebab sekalian jalan kito. Soalnyo kawenannyo diluar kota, tapi masih sekitar 2 jam perjalananlah paling lamo,” kato Farizi lagi. ‘’Yo kami usahakan Far. Paling idak, ayuk samo Mac Dul datang, walaupun kakak kau dak sempat. Yo mungkin, bagi tempat kondangan, kalo ado undangan yang barengan,” jawab Bik Jubai.
‘’Pokoknyo aku dan keluargo disano, ngarapke nian ayuk dan kakak datang atau melok. Masalah kendaraan dak usah dipikirke yuk, la kami siapke mobil. Sopirnyo ado dulur kito tulah, minyaknyo la kami isike. Yang jelas, ayuk samo kakak, termasuk mertuo dari dusun kagek, tinggal melok bae,” ungkap Farizi lagi.
‘’Nah tambah dak kelemakan kami kalo dibuat mak ini Far. Tepakso harus melok nian ini, yo sudah pokoknyo dari kami pasti ado yang kesano kagek. Kalo katek undangan lain, kami usahake kesano galo beduo,” tutur Mang Juhai. ‘’Yo kak, kagek tu, kito pegi berombongan, mungkin tigo atau empat mobil dari kito ke tempat betino calon bini adek tu,” terang Farizi.
‘’Mudahlah itu kalo mak itu, berarti kami tinggal nyiapke badan bae,” ujar Bik Jubai. ‘’Yo yuk, pokoknyo mak itulah kiro-kiro. Sekarang aku pamit balek dulu, kagek keujanan, kareno hari la mendung kak,” jelas Farizi. ‘’Yo Far, kami pokoknyo usahake melok kesano,” tambah Mang Juhai. Hahaha, lemak nian kamu ni Mang, diajak kondangan tinggal nyiapke badan, segalonyo termasuk mobil la disiapke besan galo. (sam)