MANG Juhai dan Mang Oding, agak tekejut, dengar omongan kawan lamonyo Mang Bidin, pas ketemu di jalanan di daerah Bukit. Apo omongan Mang Bidin, yang buat duo kawan kental ini heran, baco bae beritanyo sampe selesai.
Siang kemaren, Mang Juhai dan Mang Oding pake motor butut andalannyo, jalan-jalan ke daerah Bukit. Tujuan awal mereka, nak ke rumah kawan mereka, yang katonyo sedang dapat musibah. Namun, di tengah jalan, duo sohib kental ini, ketemu dengan kawan lamo mereka yang lain bernamo Mang Bidin.
‘’Hoi dindo, nak kemano kamu beduo tu,” pekik Mang Bidin dari motor. Becepat Mang Juhai ngentike motornyo, kareno tahu yang manggil Mang Bidin. ‘’Yo kando, biaso bae nak jalan, ke tempat kawan yang lagi dapat musibah. Memang kando Bidin dari mano nian siang-siang bemotor dewekan ini,” Mang Juhai balek betanyo.
‘’Apo nak jemput mama mudo kando,” celetuk Mang Oding yang dibonceng Mang Juhai. ‘’Basing bae, masih bae kamu ni pecak lamo tulah, mulutnyo kurang pacak dijago itu. Aku ni baru nak jemput anak aku yang sekolah di salah sikok Sekolah negeri dikawasan Bukit inilah dindo, biasolah caro anak gadis, nak dijago nian,” terang Mang Bidin.
‘’Nah lah besak berarti anak buah kando, tando nian la lamo idak ketemu ye,” kato Mang Juhai. ‘’Tapi tulah dindo, aku ni bingung sekarang ini. Di sekolah anak aku itu, dipungut biaya, diantaronyo beli baju sekolah, bayar duit komite ratusan ribu sebulan, setengah dipakso beli bukulah, dan lainnyo. Yo kalo uwong beduit idak masalah dindo, nah kito uwong saro, nak bayar pake apo,” rutuk Mang Bidin.
‘’Yang benar kando, makmano katonyo sekolah gratis itu, kalo masih nak bayar,” tanyo Mang Oding. ‘’Nah, madaki kando kau nak bebudi Ding. Kalo kato uwong, mungkin kito belum pecayo, ini aku dewek yang ngalami, kareno anak aku sekolah disano, jadi tau banyak nian pungutan idak jelas. Bahkan, kato anak aku, ado oknum guru jugo melok, ngomong harus bayar duit dipinta komite sekolah itu,” terang Mang Bidin lagi.
‘’Ai bahayo itu kando. Sudah, kagek aku telepon kawan kami yang wartawan itu, Triono, paling idak minta beritake dulu sekolah itu,” tutur Mang Juhai. ‘’Tapi boleh bae diberitake, kando siap jadi narasumber. Cuma namo kando jangan disebut ye, sebab kagek sekolah keponakan kamu terancam. Tolong nian ye,” pinta Mang Bidin.
‘’Yo kando, amanlah itu, sesamo kawan inilah kito nak saling tolong,” tambah Mang Juhai sambil pamit ngelanjutke jalan ke rumah kawan mereka dapat musibah itu. Hahaha, yang mak itu wajar bae nak ditolong Mang, kawan kito lagi susah. Sudah itu, perlu dipertanyoke slogan sekolah gratis di sekolah itu. Kalo memang mungut biaya nian, berarti idak patuh dengan Bapak Gubernur sekolah itu mang ye. (sam)