PAS balek dari rapat di kantor lurah sore-sore, Mang Juhai bukannyo disambut mesra, malah dirutuki oleh Bik Jubai. Apo nian masalahnyo sampe dirutuki itu mang, bacolah ceritonyo sampe tuntas.
Siang kemaren, Mang Juhai samo Mang Oding, dengan motor butut andalan, meluncur menuju kantor lurah. Ruponyo, siang itu, memang ado jadwal rapat, bahas soal adipura. Saat rapat berlangsung, Mang Juhai tibo-tibo ditelepon oleh Bik Jubai. Setelah izin keluar ruang rapat, Mang Juhai baru ngangkat telepon bininyo itu.
‘’Assalamu’alaikum, ado apo nian dek. Kakak lagi rapat,” ujar Mang Juhai. ‘’Wa’alaikumsalam. Bukan adek yang nelepon ini, tapi anak kakak ini nah minta adek nelepon,” jawab Bik Jubai. ‘’Nah, ado apo nian, penting nian apo dek, mano Mac Dul-nyo,” kato Mang Juhai, sambil minta Bik Jubai ngasihke Hp samo anak semato wayang mereka Mac Dul.
‘’Ini Bah, kan sekarang ujan terus, musim dingin. Jadi Abah balek kagek, tolong belike pempek atau tekwan bae yo. Biar ngangatke badan sore hari. Bosan pulok Mac Dul makan nasi terus,” ucap Mac Dul melalui telepon. ‘’Yo sudah, kagek Abah belike. Itu bae apo yang nak diomongke dengan Abah,” tutur Mang Juhai. ‘’Yo Bah, Cuma pesan itu bae, jangan lupo Bah ye,” ungkap Mac Dul lagi, sambel mbalekke telepon samo Bik Jubai.
‘’Caro anak kamu kak, betingkah tulah, banyak nian kendak. Yo sudah, Cuma nak nyampeke itu bae. Jangan lupo kakak tuh, kagek laju ngamuk Mac Dul-nyo,” tukas Bik Jubai sambil nutup telepon. Alhasil, sudah rapat, Mang Juhai dan Mang Oding balek. Pas di lorong, Mang Juhai belike pempek untuk Mac Dul. Tapi, pas nak beli banyak, Mang Juhai baru sadar kalo duit di kantong Cuma Rp 1.000. akhirnya, Mang Juhai cuma belike duo ikok pempek dos untuk Mac Dul.
Sampe rumah, Mang Juhai ngenjukke pempek samo Mac Dul. Dengar itu, Bik Jubai becepat ngambek piring, dengan maksud ngewadahi pempek tadi. ‘’Dak usah Mak, cuma duo ikok pempek dibelike Abah,” kato Mac Dul. ‘’Oi kak, jadi lanang tuh jangan cemekekan gino. Madaki beli pempek Cuma duo ikok, untuk anak bae idak cukup, apolagi nak ngejoke bini,” pekik Bik Jubai.
‘’Bukan apo dek, kakak katek duet nian nah. Kareno ado duit seribu, jadi Cuma dapat duo pempek dos,” jawab Mang Juhai. ‘’Dasar lanang katek aguk, beteriak rapat, keluar bemotor, tapi katek hasil. Kalo mak itu, lemaklah kamu di rumah bae, ngerewangi aku bemasak, nyuci piring, bereske rumah. Selamo ini jugo masih aku yang ngidupi keluargo kito,” tambah Bik Jubai. Hahaha, makonyo mang, kalo buntu jangan besak gaya. Madaki beli pempek untuk anak, Cuma duo ikok. Kito ni lanang mang, katek duit, usaha walaupun ngutang. (sam)