MANG Juhai laju jadi bahan ketawoan Mang Oding dan kawan-kawan mereka yang lain, saat makan pindang dikawasan Bukit, kemarin siang. Ngapo laju mak itu mang ye, simak bae ceritonyo sampe selesai.
Saat Mang Juhai dan Mang Oding, memang ngobrol di teras rumah Mang Juhai, sambil baco koran. Dak lamo mereka ngobrol, tibo-tibo Hp Mang Juhai bebunyi. Ternyato yang nelepon, kawan-kawan Mang Juhai dan Mang Oding, diwakili oleh Mang Benu, yang memang sudah lamo idak balek ke Palembang, kareno ngurusi kebon di dusunnyo.
‘’Assalamu’alaikum. Eh apo kabar dindo, lamo dak ketemu kito. Lagi ado di Palembang, apo kamu tuh,” ucap Mang Juhai. ‘’Wa’alaikumsalam kando, kabar baek. Yo aku ni lagi ado di Palembang, kangen dengan dulur-dulur, lalamo dak ketemu ini,” jawab Mang Benu melalui telepon. ‘’Apo dio rencano kito siang ini,” tanyo Mang Juhai lagi.
‘’Ini kando, untuk ngobati kangen, aku nak ngajak kando samo kando Oding, jugo dengan kawan-kawan kito yang laen untuk makan siang besamo. Kebetulan, kalo sekedar ntraktir di rumah makan biaso tapi lauknyo lemak, masih pacaklah dindo kamu ni,” terang Mang Benu. ‘’Nah, mantaplah itu, dimano rencano kito makan siangnyo. Kebetulan ini, aku lagi ngobrol samo Oding nian,” kato Mang Juhai.
‘’Kito makan siang di rumah makan di Bukit ini bae kando ye, kato kawan-kawan laen yang kutelepon duluan tadi, lauknyo terutamo pindangnyo lemak, terus regonyo masih tejangkau di kantong. Jangan lupo jam 12 kito la disano ye,” jelas Mang Benu sambil nutup telepon. Becepat Mang Juhai dan Mang Oding besiap, dan menuju rumah makan dimaksud Mang Benu.
Sampai di rumah makan, ruponyo kawan-kawan mereka yang lain, termasuk Mang Benu sudah kumpul. ‘’Langsung pesan makan bae kando,” kato Mang Benu. ‘’Yo dek, kami beduo Oding, pesan pindang palak gabus ye. Minumnyo es jeruk bae,” kato Mang Juhai samo pelayan rumah makan itu. Dak lamo, pelayan ngantarke makanan ke Mang Juhai dan Mang Oding, sementaro Mang Benu dan yang lainnya, memang la beguyur makan.
Alhasil, entah kareno lapar atau rakus, Mang Juhai idak sadar kalo dio sudah empat kali nambah nasi. ‘’Bebenar kando, la empat kali kamu tuh nambah nasi, ini namonyo bodi sedan muatan fuso,” kelakar Mang Oding yang buat ketawo Mang Benu dan kawan mereka lainnyo. ‘’Diam-diam bae Ding ah, malu kando kau ni dengar pengunjung lain, kalo sekitoan bae dak masalah,” jawab Mang Juhai sambil senyum-senyum.
‘’Sudahlah Ding, biarkelah kando kito nak nikmati makanan. Dak apo-apo, kalo sekadar makan mak ini, masih tebayar aku,” ujar Mang Benu nengahi keduonyo. Sedang bae, sudah makan, Mang Juhai sempat saro nak betegak, bahkan sendawo terus keluar dari mulutnyo. ‘’Ini baru namonyo makan siang, lemak jugo berarti pindangnyo disini ye,” tambah Mang Juhai yang buat ketawo kawan-kawannyo. Hahaha, bebenar mang, besak nian berarti muatan perut kamu tuh, kapan sampe empat kali nambah nasi mak itu. (sam)