KARENA saket ambeyen dak pacak ditahan lagi, Mang Juhai berencano nak dilariken Bik Jubai ke rumah sakit. Tapi Mang Juhai nolak dibawak ke rumah sakit, hinggo akhirnyo dibawak ke tabib. Apakah pengobatan Mang Juhai akan berhasil di tabib, kito simak bae ceritonyo.
Sudah lamo Mang Juhai diserang penyaket ambeyen, penyaket itu nyikso Mang Juhai. Duduk dak pacak, tegak saket, apolagi kalu digulingke tambah teraso saketnyo.
“Kak kito kerumah saket bae ye,” kato Bik Jubai kesian liat Mang Juhai yang nahan saket. “Dak galak dek, agek di operasi dokter,” kato Mang Juhai memelas. “Mun dak galak berubat cem mano nak sembuh,” simbat Bik Jubai lagi.
Oleh terus-terusan mengeluh akhernyo Bik Jubai ngomong lagi. “Kito ke tabib bae kak, galak dak?” tanyo Bik Jubai. “Endak dek...,” tolak Mang Juhai lagi.
“Mun kito ke tabib idak dioperasi kak, galak ye,” buyuk Bik Jubai, akhirnyo Mang Juhai setuju dibawak ke tabib.
Setelah menunggu lama diruang tunggu, namo Mang Juhai dipanggel. “Kak... namo kamu dipanggel, peh kito masuk,” ajak Bik Jubai sambel gendeng tangan Mang Juhai.
Alangke tekejutnyo Mang Juhai liat tabibnyo yang agak sedikit aneh. “Apo dio keluhannyo kak?” tanyo tabib itu agak kemayu. Mang Juhai dan Bik Jubai dak pacak ngomong apo-apo liat tingkah laku tabib itu.
“Ai cacam-cacam dek..., mun tabibnyo cem ini idak kan sembuh tambah saket bae belakang ni,” kato Mang Juhai sambek nahan saket liat tabibnyo cem banci.
“Jadi cak mano kak?” tanyo Bik Jubai. “Dak jadi bae dek berubat, biarla kutahan bae saket ni, peh kito balek,” Mang Juhai ngajak Bik Jubai balek liat tabibnyo yang banci.
Hahaha... sial nian kamu mang, saket ambeyen tambah jadi liat tabibnyo banci, makonyo lemak ke rumah saket bae hahaha. (day)