SUASANA keakraban teraso nian di kampung Mang Juhai beberapo malam liwat. Soalnyo, mereka disano ngadoke berbagai lomba, untuk menjalin silaturrahmi sesamo warga kampung. Lomba apo yang paling heboh dalam acara itu, baco ceritonyo sampe selesai.
Sekadar nak ngumpulke warganyo, biar lebih akrab lagi, Bik Jubai dan ibu-ibu di kampung sano, ngadoke berbagai lomba, yang khusus diadoke untuk bapak-bapak dan ibu-ibu. Alhasil, dari siang sampe sore, Bik Jubai nyuruh lakinyo Mang Juhai, untuk ngundang warga kampung, agar idak lupo dengan acara yang akan digelar itu.
Pas malamnyo, berbagai lomba diadoke Bik Jubai dkk, untuk memeriahkan suasana, mulai dari lomba bakiak, lari karung, lomba joget balon, sampe lomba karaoke. ‘’Bapak-bapak, ibu-ibu, kito harus melok galo lomba ini, biar tambah akrab. Kemudian, nyesal jugo bagi yang dak galak melok, kareno banyak hadiahnyo,” teriak Bik Jubai melalui mikropon.
Namun, ado yang lucu dalam lomba joget balon. Dimano, ado salah sikok peserta pasangan Mas Dik, dan tetanggonyo Bik Rik, yang jogetnyo pecak semangat nian. Soalnyo, keduo tetanggo itu, pecak nguasoi panggung nian. Mereka bejoget bekeliling panggung, sampe ado pasangan peserta lain, yang kalah kareno jingok ulah mereka beduo.
‘’Ai dak suceng ini Panitia, madaki peserta lain, sampe numbur kami, laju balon kami lepas,” protes tetanggo kampung Mang Juhai yang lain, Mang Obi, didampingi pasangan joget balonnyo Bik Del. ‘’Nah, mano tau kami panitia kalo ado peserta lain di belakang kami. Soalnyo, kami menikmati nian suasana lomba ini, sampe idak sadar waktu joget kami keliling panggung ini,” jawab Mas Dik.
‘’Segalonyo sah, ini keputusan dewan Juri dan panitia, jadi idak biso diganggu gugat ye,” ungkap Bik Jubai. ‘’Waduh susah kalo mak ini,” ujar Mang Obi lagi. ‘’Sudahlah Mang Obi, kito ni melok lomba, Cuma untuk suasana keakraban bae, bukan nak nyari hadiah nian. Siapo bae yang menang teserah, yang penting kito tehibur dengan acara ini,” celetuk Bik Vi dari belakang.
‘’Nah la benar pulok kato kamu itu Bik, setuju aku,” tutur Mas Dik sambil senyum-senyum, kareno memang sudah menang lomba. ‘’Yo sudah, pokoknyo segalo caro dipake dak apo oleh peserta, kareno juri dan panitia, menilai hasil akhirnyo dalam lomba balon ini,” tambah Bik Jubai sambil nyerahke hadiah samo pemenang. Hahaha, ambek sirunyo bae Bik Jubai yo, jangan serius nian, pecak ngejar hadiah. Hehehe. (sam)