SALAH sikok lomba lagi yang heboh di kampung Mang Juhai, yakni ‘kuis cerdas’. Ngapo laju pacak heboh itu, simak bae ceritonyo sampe tuntas.
Waktu melok lomba di kampungnyo, Mang Juhai dan tetanggo lainnyo, pokoknyo semangat galo. Waktu di lomba berupa ‘Kuis Cerdas’, Mang Juhai dan beberapo tetanggo yang setim dengan dio, sempat protes dengan panitia dan dewan juri. ‘’Ngapo jumlah peserta lomba kuis cerdas ini idak samo,” protes Mang Juhai samo panitia.
Namun, jumlah peserta itu, langsung ditambah panitia, sehinggo jumlahnyo samo. Nah saat mulai lomba, berapo pertanyaan awal, ternyato katek yang biso dijawab oleh peserta, termasuk oleh Mang Juhai dan timnyo. ‘’Ai soal jebakan galo ini, bukannyo soal serius. Bahayo nian pertanyoan panitia ini,” pekik Mang Juhai yang buat peserta lain ketawo ngakak.
Akan tetapi, setelah beberapo soal, ternyato tim dari lawan Mang Juhai Cs, malah berhasil menjawab tanyoan juri. ‘’Juri, kami nak protes, ngapo jawaban Tim itu disahkan dan dibenarke, padahal jawabannyo masih salah,” protes Mang Juhai. ‘’Maksud salahnyo cak mano mang, cubo jelaske dulu, idak ngerti kami nih,” juri balek betanyo.
‘’Yolah, kawan tim lain tadi tuh jawabnyo kacamato bae kan, semestinyo jawaban yang benar itu kacamato itam. Makonyo, kami anggap jawaban tim lain itu masih salah, katek nilai jugo,” terang Mang Juhai. ‘’Mak ini bae mang, yang penting maksud jawabannyo la keno, bukan bedake kacamato dengan kacamato itamnyo lagi, oke. Keputusan juri dak biso diganggu gugat,” ungkap sang juri sambil senyum-senyum.
‘’Sudahlah kando, kito nih ngambek sirunyo bae, bukan nak nyejarke hadiah nian. Yang penting rame, tetanggo kumpul, silaturrahmi tejalin, bukan nak nyari hadiah nian kito nih,” pekik Mang Oding dari belakang. ‘’Yo sudah Ding kalo kendak kau la mak itu, yang penting kito senang bae, bukan nak ngumpulke hadiah. Kapan dapat di kito galo, laju kawan lain dak kebagian pulok,” jawab Mang Juhai. Hahaha, salah paham bae mungkin mang, yang penting arah jawabannyo la benar, walaupun masih kurang dikit. (sam)