KARENO bawakan puaso, Mang Juhai laju banyak pengen dengan makanan, pas dio jalan sore samo Mang Oding, ke Pasar Bedug dekat rumahnyo. Apo bae gawe Mang Juhai di pasar itu, simak bae ceritonyo sampe selesai.
Sore kemaren, Mang Juhai dan Mang Oding, jalan-jalan ke Pasar Bedug dekat rumahnyo. Pas di Pasar, tejingok banyak uwong jualan dan macam-macam makanan yang dijual. Karuan bae, Mang Juhai laju ngiler dan pengen melahap makanan-makanan kesenangannyo, mulai dari menu buko sampe lauk. ‘’Nah Ding, laju ngiler aku jingok makanan ini,” kato Mang Juhai samo Mang Oding.
‘’Sabar kando, paling berapo jam lagi buko. Kamu ngiler, kalo kagek bekurang pahalo puaso. Cuma kalo nak beli makanan itu, boleh bae, untuk buko dan lauk makan,” simbat Mang Oding. ‘’Pokoknyo aku nak beli galo Ding, rasonyo pengen nian aku. mulai dari es dawet, celimpungan, sambel pete, sampai ke berengkes tempoyak itu,” ucap Mang Juhai.
‘’Ya kando, alangkah idak bekelasnyo makanan kamu ni. Payo nyari martabak apo, atau pindang tulang, pokoknyo yang elite dikit kando,” jawab Mang Oding. ‘’Ai Ding, bekelas nian. Makmano memang dari kecik, kito dikasih uwong tuo makanan mak itu, laju sampe tuo nagih. Pecak kau bekelas bae makan, awak paling hobi makan lalap terong samo sambel caluk,” tutur Mang Juhai.
‘’Yo sudah kando, jangan kuat-kuat, malu dengar uwong. Sudah kando nak beli apo teserah, aku jugo nak beli makanan selera aku,” bisik Mang Oding, yang malu, takut kagek omongan Mang Juhai didengar budak-budak kampung. Alhasil, Mang Juhai borong segalo makanan kesenangannyo. Mak itu jugo Mang Oding, jugo borong makanan seleranyo, diantaronyo pecak yang diomongke Mang Juhai.
Sampe di rumah, Mang Juhai langsung ngasih makanan ke Bik Jubai. ‘’Alangke banyaknyo kak, kalo rugi kito mak ini terus. Pecak kesetanan bae, kamu beli makanan,” ujar Bik Jubai. ‘’Dak pacak dek, pengen. Kito puaso ni, terkadang samo pecak uwong sakit, pengen makan ini, pengen nyicip itu, kagek dak dibeli, laju ngiler dan tebayang terus,” jawab Mang Juhai.
Apo dio, pas buko puaso, Mang Juhai tejingok banyak makanan pucuk meja itu, laju kenyang jingoknyo bae. ‘’Nah laju Cuma nyicip bae, kalo la buko, padahal tadi ngembat nian makanan-makanan ini,” ungkap Mang Juhai. ‘’Makonyo kak, kito puaso tu nahan hawa nafsu jugo. Bukan Cuma nafsu dengan betino, tapi nafsu makan. Daripado teborong banyak idak temakan mak ini, mubazir jugo jadinyo,” tambah Bik Jubai. Hahaha, benar kato Bik Jubai tu mang, nafsu bae kamu nak makan segalonyo tu, setelah buko ilang galo nafsunyo, paling sekedar nyicip bae, la kenyang perut. (sam)