RUPONYO bukan cuma samo Bik Jubai bae Mang Juhai ni takut, tapi samo binatang jugo. Nak tau binatang apo yang ditakuti oleh Mang Juhai, peh kito samo-samo baco ceritonyo.
“Sini kando..., ngapo njauh tu?” tanyo Mang Oding bingung liat Mang Juhai dak galak deket-deket.
Padahal disampeng Mang Oding ado cewek cantik montok seksi sesuai dengan selera Mang Juhai. Tapi aneh nian sekali ini, ngapo Mang Juhai dak galak deket samo cewek itu. Mang Oding duduk dibangku meja no 35, sedangken Mang Juhai duduk dimeja no 68.
“Kando..., kenalan dulu samo Tina,” kato Mang Oding manggel Mang Juhai disuruh kenalan samo Tina. “Agek bae Ding..., jangan sekarang,” simbat Mang Juhai dari jarak jauh.
“Ngapo kak kawannyo, lagi saket apo?” tanyo Tina samo Mang Oding, liat Mang Juhai aneh dak galak deket. “Idak dek... biaso la mun nak kenalan tu baru-baru cicak malu-malu, agek lamo-lamo malu-maluke,” kato Mang Oding.
“Kando... nak kesini apo idak, cewek ni ngajak kenalan samo kamu,” panggel Mang Oding lagi. “Agek bae Ding..., jangan sekarang,” kato Mang Juhai dari jauh.
Dak lamo, Mang Juhai bedeket samo Oding yang duduk samo cewek cantik tadi. “Mano cewek tadi Ding..., cantik nian budaknyo, kenalin oi,” kato Mang Juhai memelas.
“Ai cacam-cacam kando..., sial nian kamu, geleran tadi dipanggel-panggel dak galak deket, sekarang wongnyo la belari malah nanyo. Memangnyo ngapo kamu tadi?” tanyo Mang Oding penasaran.
“Tadi ado tikus dibawah kursi kau, aku ketakutan Ding, ngeri nian aku samo tikus itu, besak nian,” jawab Mang Juhai polos. “Hahahha. kato aku tadi ngapo, ruponyo takut samo tikus hahaha... sial nian kamu kando,” kato Mang Oding ngakak dak berenti.
Hahaha... madaki lantak tikus bae kamu takut mang, itu la jadinyo nak kenalan samo cewek laju urung gara-gara takut samo tikus. Nyari tempat nongkrong pulok idak milih, tempat banyak tikus mak itu, hahaha. (sam)